काकानेच पाठवले अश्लील मेसेज, अल्पवयीन मुलीने संपवले जीवन

ही घटना सहा सप्टेंबर रोजी घडली होती. त्यानुसार, उशिरा तीन महिन्यानंतर मृत मुलीच्या आईने दिराविरोधात भोसरी पोलीस ठाण्यात तक्रार दिली आहे.

पिंपरी-चिंचवड -शहरातील भोसरी इंद्रायणी नगर येथे काका करत असलेल्या अश्लील त्रासाला कंटाळून 17 वर्षीय अल्पवयीन मुलीने आत्महत्या केल्याचे प्रकरण समोर आले आहे. ही घटना सहा सप्टेंबर रोजी घडली होती. त्यानुसार, उशिरा तीन महिन्यानंतर मृत मुलीच्या आईने दिराविरोधात भोसरी पोलीस ठाण्यात तक्रार दिली आहे.

2018ला काकाकडे गेली होती संबंधित मुलगी

पोलिसांनी दिलेल्या माहितीनुसार, मृत मुलगी 2018मध्ये औरंगाबाद येथे तिच्या काकांकडे राहण्यास गेली होती. त्यानंतर, म्हणजे ६ सप्टेंबर २०२० रोजी मृत मुलीच्या आईला तिच्या मित्राने तुमच्या मुलीला तिचा चुलता अश्लील मॅसेज करत असल्याचे सांगितल्याने हे प्रकरण उघडकीस आले.

अश्लील मॅसेज पाठवत असल्याचे मुलीने आईला सांगितले

तातडीने मुलीच्या बेडरूमध्ये तक्रारदार आई गेली, मुलीला याबद्दल विचारले असता होकार दिला आणि मोबाईलमध्ये अश्लील मसेजचे सर्व स्क्रीन शॉर्ट आहेत ते बघून घे, अे म्हटली. दरम्यान, अल्पवयीन मुलगी दुसऱ्या रूमच्या गॅलरीमध्ये गेली आणि तिथून उडी घेतली. हे सर्व पाहून फिर्यादी जागीच बेशुद्ध पडल्या.

मृत मुलीने लिहिलेली चिठ्ठी आईला सापडली

जखमी मुलीला तातडीने रुग्णालयात घेऊन जाण्यात आले. तिच्यावर खासगी रुग्णालयात उपचार सुरू झाले. परंतु प्रकृती गंभीर होती. घटनेच्या दुसऱ्या दिवशी अल्पवयीन मुलीची आई घरकाम करत असताना चिठ्ठी मिळून आली, ज्यात काका अश्लील मॅसेज करत असल्याचे म्हटले आहे. मात्र, घरात भांडण होतील म्हणून याची वाच्यता केली नसल्याचा उल्लेख आहे.

उपचारादरम्यान अल्पवयीन मुलीचा मृत्यू

दहा दिवसांच्या उपचारादरम्यान मुलीचा मृत्यू झाला. या सर्व धक्क्यातून सावरायला मुलीच्या कुटुंबाला तीन महिने लागले. त्यानंतर शुक्रवारी काकाविरोधात गुन्हा दाखल केला आहे. घटनेचा अधिक तपास भोसरी पोलीस करत आहेत.

चिठ्ठीमध्ये नेमके काय आहे?

मम्मी तुला एका व्यक्तीबद्दल सांगायचे आहे, आपल्या घरातील काका माझ्याशी गैरवर्तन करतात. हे सर्व घरात भांडण होईल म्हणून मी सांगितले नाही. मॅसेज करून माझ्याशी अश्लील बोलतात. माझ्या मोबाईलमध्ये स्क्रिनशॉट काढून ठेवले आहेत. त्यांना ब्लॉक केले आहे, हे तुला कसे सांगू समजत नव्हते आणि काय करू. काळजी घ्या...