पंतप्रधान नरेंद्र मोदी उद्या पुणे दौऱ्यावर, सिरम इन्स्टिट्यूटला देणार भेट

पंतप्रधान नरेंद्र मोदी यांचे विमान दुपारी साडेबारा वाजता पुणे विमानतळावर उतरेल. तेथून ते चॉपरने सिरम इन्स्टिट्यूटमध्ये पोहोचतील. त्यानंतर पुढच्या तासाभरात ते कोविशील्ड लसीसंदर्भात आढावा घेणार आहेत. पंतप्रधानांच्या या दौर्‍याच्या पार्श्वभूमीवर वरिष्ठ पोलीस अधिकारी आणि दिल्लीतील तपास यंत्रणा यांच्या उपस्थितीत सुरक्षेचा आढावा घेण्यास सुरुवात झाली आहे.

पुणे - पंतप्रधान नरेंद्र मोदी उद्या पुणे दौऱ्यावर येणार असून ते सिरम इन्स्टिट्यूटला भेट देणार आहेत. आपणा सर्वांना माहीतच आहे की, सिरम इन्स्टिट्यूटमध्ये कोरोनावरील लस तयार केली जातेय. सिरम इन्स्टिट्यूट आणि ऑक्सफर्ड युनिव्हर्सिटी यांच्या भागीदारीतून ही लस तयार करण्याचे काम सुरू आहे. ही लस 90 टक्के परिणामकारक असल्याचे सिरम इन्स्टिट्यूटकडून यापूर्वीच सांगण्यात आले आहे. या पार्श्वभूमीवर पंतप्रधान नरेंद्र मोदी सिरम इन्स्टिट्यूटला भेट देणार आहेत.

हेही वाचा -अहमदाबाद-पुणे-हैदराबाद, असा असेल पंतप्रधान मोदींचा कोरोना व्हॅक्सिन दौरा

पंतप्रधान नरेंद्र मोदी यांचे विमान दुपारी साडेबारा वाजता पुणे विमानतळावर उतरेल. तेथून ते चॉपरने सिरम इन्स्टिट्यूटमध्ये पोहोचतील. त्यानंतर पुढच्या तासाभरात ते कोविशील्ड लसीसंदर्भात आढावा घेणार आहेत. पंतप्रधानांच्या या दौर्‍याच्या पार्श्वभूमीवर वरिष्ठ पोलीस अधिकारी आणि दिल्लीतील तपास यंत्रणा यांच्या उपस्थितीत सुरक्षेचा आढावा घेण्यास सुरुवात झाली आहे.

पंतप्रधानांच्या दौऱ्याच्या पार्श्वभूमीवर सिरम इन्स्टिट्यूट परिसरात पोलिसांचा कडेकोट बंदोबस्त आहे. बॉम्बशोधक व नाशक पथकाकडून लोहगाव विमानतळ परिसर परिसर या भागात तपासणी केली जात आहे. पंतप्रधानांच्या दौऱ्यावेळी राज्याचे पोलीस महासंचालक आणि आणखी काही वरिष्ठ अधिकारी उपस्थित राहणार आहेत.

दरम्यान, पंतप्रधान मोदी लोहगाव विमानतळावर विशेष विमानाने दाखल होतील. त्यानंतर तेथून ते हेलिकॉप्टरने सिरम इन्स्टिट्यूटला भेट देतील. याबरोबरच पंतप्रधानांना पुणे विमानतळावरून वाहनाने सिरम इन्स्टिट्यूटला जायचे असल्यास त्या दृष्टीने ही पर्यायी मार्ग आखण्यात आला आहे.

हेही वाचा -पंतप्रधान मोदी भेट देणाऱ्या सिरम इन्स्टिट्यूटमध्ये कोरोना लसीवर असे होतेय काम

शनिवार, 28 नोव्हेंबर, पंतप्रधान मोदींच्या पुणे दौर्‍याचा तपशील

• पंतप्रधान नरेंद्र मोदी शनिवारी सकाळी 11 वाजून 10 मिनिटांनी अहमदाबाद विमानतळावरून पुण्याकडे निघतील.
• दुपारी 12 वाजून 25 मिनिटांनी पंतप्रधानांचे पुणे लोहगाव विमानतळावर आगमन होईल.
• पंतप्रधान मोदी 12 वाजून 30 मिनिटांनी हेलिकॉप्टरने सिरम इन्स्टिट्यूट जवळील हेलिपॅडकडे रवाना होतील. त्यानंतर 12 वाजून 50 मिनिटांनी हेलिपॅडवरून गाडीने इन्स्टिट्यूटच्या आता प्रवेश करतील.
• दुपारी 1 ते 2 या एक तासात पंतप्रधान सिरम इन्स्टिट्यूटमध्ये असतील. या ठिकाणी कोरोनावरील कोविड - 19 लसीच्या सद्यस्थितीबाबत माहिती घेतील.
• 2 वाजून 5 मिनिटांनी पंतप्रधान हेलिकॉप्टरने पुणे विमानतळाकडे रवाना होतील.
• 2 वाजून 40 मिनिटांनी पंतप्रधान विमानाने हैद्राबादला रवाना होतील आणि दुपारी 3 वाजून 45 मिनिटांना पंतप्रधान हैद्राबाद विमानतळावर पोहचतील.