पुण्यात अल्पवयीन मुलाचा खून, मृतदेह निर्जन ठिकाणी फेकला

पुणे शहरात कोथरूड परिसरात एका अकरा वर्षीय मुलाचा मृतदेह सापडल्याने एकच खळबळ उडाली आहे.

पुणे - शहरातील कोथरूड परिसरात एका अकरा वर्षीय मुलाचा मृतदेह सापडल्याने एकच खळबळ उडाली आहे. या मुलाच्या डोक्यात सिमेंटच्या गट्टूने मारहाण केली आहे. मृतदेह सापडल्याची माहिती मिळाल्यानंतर कोथरुड पोलिसांनी घटनास्थळी धाव घेतली. मृतदेह ताब्यात घेऊन शवविच्छेदनासाठी ससून रुग्णालयात पाठवण्यात आला. कोथरूड पोलीस ठाण्यात याप्रकरणी खुनाचा गुन्हा दाखल करण्यात आला आहे.

मागील दोन दिवसांपासून होता बेपत्ता-

पोलिसांनी दिलेल्या माहितीनुसार, विश्वजीत वंजारी (वय 11) असे खून झालेल्या मुलाचे नाव आहे. केळेवाडी परिसरात तो राहत होता. मागील दोन दिवसांपासून तो बेपत्ता होता. कोथरूड पोलीस ठाण्यात याप्रकरणी अपहरणाचा गुन्हा दाखल आहे. पोलीस या मुलाचा शोध घेत असताना आज दुपारच्या सुमारास पौड रस्त्याशेजारी असणाऱ्या एका निर्जन ठिकाणी त्याचा मृतदेह पोलिसांना सापडला. त्यानंतर वरिष्ठ पोलीस अधिकाऱ्यांनी घटनास्थळी धाव घेतली.

खुनाचा गुन्हा दाखल-

दोन दिवसांपासून पोलीस या मुलाचा शोध घेत होते. त्यांनी केळेवाडी वसाहती शेजारी असणाऱ्या जंगलात शोध घेतला. परंतु तो सापडला नाही. केळेवाडी परिसरातील ड्रेनेजची पाहणी केली. त्यानंतर आज दुपारी कोथरूड परिसरातील निर्जन ठिकाणी शोध घेत असताना त्याचा मृतदेह सापडला. पोलिसांनी याप्रकरणी खुनाचा गुन्हा दाखल केला आहे. याप्रकरणी एका अल्पवयीन मुलाला कोथरुड पोलिसांनी ताब्यात घेतले असून अधिक तपास सुरू आहे.

हेही वाचा-९४ व्या मराठी साहित्य संमेलनाला कवी कुसुमाग्रजांचं नाव देणार - छगन भुजबळ