पुणे - पिंपरी आणि पुणेमधील मेट्रो मार्गांचे काम अंतिम टप्प्यात आले असून डिसेंबर 2021 अखेर हे दोन्ही मार्ग सुरू करण्यात आहेत. त्यापूर्वी केंद्रीय मेट्रो रेल्वे सुरक्षा आयुक्‍तांना पाहणी झाल्यानंतर हे दोन्ही मार्ग सुरू करण्यात येणार आहेत अशी माहिती पुणे मेट्रोचे परिचालन आणि यंत्रणा संचालक विनोद कुमार अग्रवाल यांनी दिली आहे.
मेट्रोचे 65 टक्के काम पूर्ण -
पुणे मेट्रोच्या वनाज ते रामवाडी आणि पिंपरी चिंचवड ते स्वारगेट या दोन मार्गांचे एकत्रितरित्या 65 टक्के काम पुर्ण झाले आहे. तर या मार्गाचे उर्वरीत काम 31 डिसेंबरपर्यंत पुर्ण करण्याचे सध्या नियोजन आहे. मेट्रोचे सर्व काम पुर्ण झाल्यानंतर केंद्रीय मेट्रो रेल्वे सुरक्षा आयुक्तांकडून या मार्गाची पाहणी केली जाणार आहे, असेही विनोद कुमार अग्रवाल यांनी सांगितले आहे.
सर्व कामे वेगाने सुरू -
या दोन्ही मार्गांचे सिव्हिल वर्क पुर्ण झाले असल्याची माहिती अग्रवाल यांनी दिली आहे. तर यासोबत रूळ टाकण्याचे तसेच विद्युत पुरवठ्यांच्या तारा जोडणे, सिग्नल यंत्रणा आणि स्थानकांची अशी इतर कामं वेगाने सुरू आहेत. ही कामे जास्त वेगाने कशी होतील, याचे नियोजन सुरू आहे आणि ही सर्व कामे एकाच वेळी पुर्ण व्हावी यासाठी 10 वेगवेगळे विभाग कार्यरत असल्याची माहितीही अग्रवाल यांनी दिली आहे.