आंबिल ओढा परिसरात कारवाई करण्यापूर्वी नागरिकांना विश्वासात घेऊ - महापौर

पुणे सत्र न्यायालयाने आंबिल ओढा परिसरातील बांधकामे हटवण्यासाठी दिलेली स्थगिती उठविली आहे. त्यामुळे आता आंबिल ओढा परिसरात महापालिकेने कारवाई करायचे ठरवल्यास त्या ठिकाणी अतिक्रमण हटाव मोहीम राबविण्यात येऊ शकते. यावर महापौर मोहोळ यांनी प्रतिक्रिया दिली आहे. ते म्हणाले....

पुणे - आंबिल ओढा परिसरातील बांधकामे हटवण्यासाठी पुणे सत्र न्यायालयाने दिलेली स्थगिती न्यायालयाने उठविली आहे. त्यामुळे आता आंबिल ओढा परिसरात महापालिकेने कारवाई करायचे ठरवल्यास त्या ठिकाणी अतिक्रमण हटाव मोहीम राबविण्यात येऊ शकते. विशेष म्हणजे वरिष्ठ न्यायालयात अपील करेपर्यंत तरी अतिक्रमण हटाव मोहीम राबविल्यास मनाई करण्यात यावी, ही आंबिल ओढा परिसरातील नागरिकांची मागणी ही न्यायालयाने फेटाळली आहे. त्यामुळे आता महापालिका कारवाई करणार का याकडे सर्वांचे लक्ष आहे.

'न्यायालयाने स्थगिती उठवली'

पुण्याचे महापौर मुरलीधर मोहोळ यांनी मात्र या विषयी महापालिकेची भूमिका स्पष्ट केली. ते म्हणाले, न्यायालयाने जरी स्थगिती उठवली असली तरीही लोकांना विश्वासात न घेता कारवाई करू नये अशा सूचना मी आयुक्तांना दिल्या आहेत. सध्या पावसाचे दिवस आहेत त्यामुळे हा विचार करून आणि स्थानिक नागरिकांशी चर्चा केल्याशिवाय कुठल्याही प्रकारची कारवाई करू नये, अशा सूचना प्रशासनाला दिल्या आहेत, असे ते म्हणाले.

'नागरिकांना विश्वासात घेतल्याशिवाय कारवाई नाही'

आंबिल ओढा परिसरात यापूर्वी जेव्हा कारवाई करण्यात आली होती. तेव्हा देखील मी महापालिका आयुक्तांना बोललो होतो. त्यावेळेस झालेली कारवाई पहाटेच्या सुमारास आणि मोठा पोलीस बंदोबस्तात झाली होती. त्याची कल्पना आमच्यापैकी कुणालाही नव्हती. त्यामुळे कोर्टाचा आदेश आल्याबरोबर पालिका आयुक्तांना नागरिकांना विश्वासात घेतल्याशिवाय कारवाई करायची नाही असे स्पष्ट सांगितले आहे, असे मुरलीधर मोहोळ यांनी म्हटले आहे.

स्थानिकांनी केला होता विरोध -

पुणे महापालिकेकडून आंबिल ओढा परिसरात 24 जून रोजी अतिक्रमणे हटविण्याचा प्रयत्न झाल्यावर स्थानिक नागरिकांकडून त्याला जोरदार विरोध झाला होता. त्यानंतर सत्ताधारी आणि विरोधक यांच्यामध्ये राजकीय आरोप-प्रत्यारोप झाले होते. स्थानिकांकडून न्यायालयात दाद मागण्यात आल्यावर या कारवाईला स्थगिती देण्यात आली होती.