पुणे- पिंपरी-चिंचवड येथे किरकोळ कारणावरुन पतीने स्वत:च्या पत्नीचा खून केल्याची घटना घडली आहे. हत्येनंतर आरोपी सांगवी पोलीस ठाण्यात हजर झाला. पिंपळे गुरव परिसरात पहाटे साडेचारच्या सुमारास संबंधित प्रकार घडला आहे.
घटनेबाबत अधिक माहिती देताना पोलीस अधिकारी शैला लोखंडे (वय-45) असे हत्या झालेल्या महिलेचे नाव असून हनुमंत लोखंडे (वय-59) असे आरोपी पतीचे नाव आहे. आरोपीचा हा तिसरा विवाह असल्याची महिती पोलिसांनी दिली आहे. यासंदर्भात मुलगा शिवाजी हनुमंत लोखंडेने सांगवी पोलीस ठाण्यात फिर्याद दिली आहे. पोलिसांनी दिलेल्या माहितीनुसार पिंपळे गुरव येथील वैद वस्तीत हा प्रकार घडला.
मुलासमोर 'तो' कोयत्याने वार करत राहिला...जाणून घ्या घटनाक्रम
शैला आणि हनुमंत यांच्यात अनेकदा किरकोळ कारणावरून वाद होत होते. पहाटेच्या सुमारास पुन्हा दोघांमध्ये भांडण झाले. पत्नी प्रत्येकवेळी पोलिसांत जाण्याची धमकी देत असे. त्यामुळे वैतागून 'एकदाचा कारागृहात जातो', असे म्हणत हनुमंत याने शैलावर कोयत्याने वार केले.
आपल्या सावत्र आईचा आवाज ऐकून त्यांचा मुलगा शिवाजी धावत खाली आला. मात्र, खोलीचा दरवाजा बंद होता. यानंतर त्याने खिडकीची काच फोडून वडिलांना समजवण्याचा प्रयत्न केला. परंतु, त्यांनी न जुमानता कोयत्याने वार करून पत्नीची हत्या केली. मृत पत्नी रक्ताच्या थारोळ्यात पडली होती. खोलीला कुलूप लावून आरोपी पती सांगवी पोलीस ठाण्यात गेला; व त्याने पोलिसांना सविस्तर माहिती दिली. घटनेचा अधिक तपास पोलीस उपनिरीक्षक विनोद शेंडकर करत आहेत.
