एल्गार परिषद प्रकरण : पुणे पोलीस 'एफबीआय'ची मदत घेण्याची शक्यता

एल्गार परिषद प्रकरणातील खराब झालेल्या हार्ड डिस्कमधील डेटा परत मिळवण्यासाठी पुणे पोलीस अमेरिकी यंत्रणेची मदत घेणार असल्याची माहिती समोर येते आहे.

पुणे - एल्गार परिषद प्रकरणातील खराब झालेल्या हार्ड डिस्कमधील डेटा परत मिळवण्यासाठी पुणे पोलीस अमेरिकी यंत्रणेची मदत घेणार असल्याची माहिती समोर येते आहे. 2017 मध्ये 31 डिसेंबरला शहरातील शनिवारवाडा येथे एल्गार परिषद आयोजित करण्यात आली होती. पुढील दिवशी भीमा-कोरेगाव येथे विजयस्तंभ अभिवादन करण्यासाठी लाखोंचा जनसमुदाय उपस्थित होता. यावेळी मोठी दंगल झाली होती.

हेही वाचा : 'एल्गार परिषद प्रकरणी पुणे पोलिसांच्या कारवाईची एसआयटी चौकशी करावी'

संबंधित प्रकारानंतर पोलिसांनी अटकसत्र सुरू केले. यामध्ये परिषदेतील वक्त्यांनी केलेल्या भाषणांचा आधार घेण्यात आला. सध्या नक्षली चळवळीशी संबंधित आठ जण अटकेत आहेत. यामधील आरोपी वरवरा राव यांच्या घरातून शहर पोलिसांनी एक हार्डडिस्क जप्त केली होती. ती ओपन होत नसल्यामुळे पुणे पोलिसांनी चार वेगवेगळ्या फॉरेन्सिक लॅबची मदत घेतली. परंतु, अद्याप त्यांना यामध्ये यश न आल्याने आता पोलीस अमेरिकेच्या एफबीआय या एजन्सीची मदत घेणार असल्याचे समोर आले आहे.

यासाठी पुणे पोलीस आणि फॉरेन्सिक तज्ज्ञांचे एक पथक लवकरच अमेरिकेला रवाना होणार असल्याची माहिती सुत्रांनी दिली आहे.