बारामती - मोरगाव हे अष्टविनायकातील प्रथम स्थान आहे. वर्षभर येथे राज्यभरातून लाखो भाविक दर्शनासाठी येत असतात. मात्र कोरोनामुळे दीड वर्षांपासून मंदिरे बंद आहेत. त्यामुळे मंदिर परिसरात भाविकांचा शुकशुकाट आहे. कोरोनामुळे भाविकच येत नसल्यामुळे छोटेमोठे व्यवसायिक आर्थिक विवंचनेत सापडले आहेत. सरकारने आम्हाला योग्य ती मदत करावी अशी अपेक्षा तेथील महिलांनी ईटीव्ही भारतशी बोलताना व्यक्त केली.
सरकारला गांभीर्य नाही
कोरोनामुळे दोन वर्षात आमच्यावर मोठी बेकारीची वेळ आली आहे. सरकारला याचे कसलेही गांभीर्य नाही. मंदिरे बंद असल्यामुळे परिसरात चिक्कू, पेरू, सिताफळ विकून वर्षाकाठी अडीच ते तीन लाख रुपये मिळत होते. यावर्षी फक्त साठ हजार रुपये मिळाले. मागील वर्षी तर एकही रुपया मिळाला नाही. यापेक्षा आणखी दुःख मी सांगू शकत नाही. मंदिरावर अवलंबून असणारे व्यवसायिक जगतील की मरतील याचे कसलेही गांभीर्य सरकारला नसल्याची उद्विग्न प्रतिक्रिया शंकर तावरे यांनी दिली.
मंदिरे उघडल्यानेच कोरोना पसरतो का
मंदिर बंद असल्यामुळे माझा फुलांचा व कटलरी व्यवसायावर त्याचा मोठा परिणाम झाला आहे. मंदिर बंद असले तरी आम्हाला लाईटबिल, गाळे भाडे द्यावेच लागते. सर्वत्र सभा आंदोलने सुरू आहेत. तिथं कोरोना पसरत नाही का.. मंदिरातच कोरोना पसरतोय का.. मंदिरात शासकीय नियमांचे पालन केले जाते. आम्ही त्याचे पालन करत असतो.बाकी सर्व खुले असताना मंदिरही उघडली जावीत अशी अपेक्षा संजीवनी केदारी, सुरेखा केदारी, सिद्धी इनामदार या महिला व्यवसायिकांनी केली आहे.
हेही वाचा -Saki Naka Rape Case: बलात्कार प्रकरणात एकच आरोपी, नराधमाला 21 सप्टेंबरपर्यंत पोलीस कोठडी