पे अँड पार्क धोरणाला पिंपरी-चिंचवडमधील नागरिकांचा विरोध

सत्तारूढ पक्षनेते नामदेव ढाके यांनी वाहनचालकांना शिस्त लावण्यासाठी पे अँड पार्क धोरण राबवल जात असल्याचे म्हटले आहे. तर मनसेचे गटनेते सचिन चिखले यांनी मात्र या धोरणाला विरोध दर्शविला आहे.

पुणे - पिंपरी-चिंचवड शहरातील पे अँड पार्कमुळे नागरिकांना भुर्दंड बसणार आहे. आधीच कोरोनामुळे नागरिक त्रस्त आहेत त्यात शहरातील पे अँड पार्कमुळे नागरिकांना आर्थिक भुर्दंड सहन करावा लागणार आहे. यावर, सत्तारूढ पक्षनेते नामदेव ढाके यांनी वाहनचालकांना शिस्त लावण्यासाठी पे अँड पार्क धोरण राबवल जात असल्याचे म्हटले आहे. तर मनसेचे गटनेते सचिन चिखले यांनी मात्र या धोरणाला विरोध दर्शविला आहे.

27 लाखांपेक्षा अधिक लोकसंख्या

पिंपरी-चिंचवड शहरात 27 लाखांपेक्षा अधिक लोकसंख्या असून वाहन पार्क करण्यासाठी जागेचा अभाव आहे, हे प्रत्येक ठिकाणी जाणवते. त्यामुळेच पिंपरी मार्केटमध्ये अनेकदा वाहनचालकांना दुचाकी पार्क करताना अनेक अडचणी येतात. चारचाकी वाहन घेऊन चालक तिथे जाऊच शकत नाही, अशी परिस्थिती आहे. याच पार्श्वभूमीवर शहरात विविध ठिकाणी महानगरपालिका पे अँड पार्क धोरण राबवत असून तासाला वाहनचालकाला भुर्दंड भरावा लागणार आहे.

नागरिकांमधून नाराजीचा सूर

आधीच कोरोना कोरोना महामारीने सर्वसामान्य जनतेचे आर्थिक कंबरडे मोडले असून त्यात पुन्हा कोरोना डोके वर काढत आहे. अश्यात पिंपरी-चिंचवड महानगरपालिका पे अँड पार्क धोरण राबवत असल्याने नागरिकांमधून नाराजीचा सूर उमटत आहे. झोपडपट्टी आणि स्लम परिसरात हे धोरण राबवल जात असून ते हॉस्पिटल, हॉटेल, अशा ठिकाणी राबवावे, असे सामाजिक कार्यकर्ते संतोष निसर्गंध यांनी म्हटले आहे.

निश्चित केलेले पार्किंग दर (प्रत्येकी तास)

• दुचाकी - 5 रुपये
• चारचाकी - 10 रुपये
• टेम्पो, मिनीट्रक - 15 रुपये
• मिनी बस - 25 रुपये
• खासगी बस - 100 रुपये
• ट्रक, ट्रेलरसाठी 100 रुपये