पुणे - आशा कर्मचाऱ्यांनी त्यांच्या मागण्यांसाठी आंदोलन केले तर उपमुख्यमंत्री अजित पवार यांनी त्यांच्या मागण्या ऐकूनही घेतल्या नाहीत, याचा आपण निषेध करतो, असे भाजपा प्रदेशाध्यक्ष चंद्रकांत पाटील यांनी म्हटले आहे. ते पुण्यात बोलत होते. शुक्रवारी (आज) पुण्यात चंद्रकांत पाटील यांनी महापालिका आयुक्तांची भेट घेतली. त्यानंतर ते पत्रकारांशी बोलत होते. विधिमंडळाच्या आगामी अधिवेशनात भारतीय जनता पार्टी आशा कर्मचाऱ्यांच्या प्रश्नावर सरकारला धारेवर धरेल, असे चंद्रकांत पाटील म्हणाले. अन्यायाच्या विरोधात बोलता कामा नये, असे या सरकारचे धोरण आहे. कोणीही आंदोलन केले की लगेच गुन्हे दाखल करायचे, लाठीचार्ज करायचा असे चालू आहे. ज्या आशा कर्मचाऱ्यांनी जिवावर उदार होऊन गेली दीड वर्षे कोरोनाच्या साथीत काम केले, त्यांच्या मागण्या उपमुख्यमंत्र्यांनी गाडीत बसून ऐकून तरी घ्यायला हव्या होत्या. पण ‘हम करे सो कायदा’, असे चालू आहे. याचा आपण निषेध करतो. विधिमंडळाच्या आगामी अधिवेशनात या प्रश्नावर भाजपा सरकारला धारेवर धरेल, असेही पाटील म्हणाले.
'...तर भाजपा कार्यकर्तेही सक्षम'