पुणे पोलिसांची ई-तक्रारींकडे पाठ; 32 पोलीस ठाण्यात तब्बल 287 तक्रारी प्रलंबित

शहरातील 32 पोलिस ठाणे अंतर्गत तब्बल २८७ ई-तक्रारी प्रलंबित आहेत. त्यातील वारजे माळवाडी, सिंहगड रोड, दत्तवाडी, चंदननगर, चतुःशृंगी, येरवडा, हडपसर, वानवडी, कोंढवा या पोलिस ठाण्यात सर्वाधिक ई-तक्रारी प्रलंबित आहेत. काही ठाण्यांत प्रलंबित तक्रारींची संख्या शून्य आहे.

पुणे -राज्य शासनापासून ते नगरपालिकेपर्यंत आणि पोलिस दलापासून एसटी महामंडळापर्यंत सर्वांनी ‘सिटिझन पोर्टल’ कार्यान्वित केली आहेत. मात्र, या पोर्टलवर केलेल्या तक्रारी कडे पोलीस पाठ करत असल्याचे चित्र पाह्यला मिळत आहे. पोलिस दलाच्या पोर्टलवर पुण्यातील 32 पोलिस ठाण्याअंतर्गत तब्बल 287 तक्रारींचा निपटारा झालेला नाही. दिवसेंदिवस हा आकडा वाढतो आहे. पुणे शहरात सिटीझन पोर्टलच्या माध्यमातून नागरिकांनी दाखल केलेल्या ऑनलाइन (ई-तक्रारी) तक्रारी मोठ्या प्रमाणात पोलिस ठाणे दरबारी प्रलंबित असल्याचे समोर आले आहे. त्यामुळे सर्व पोलिस ठाणेप्रमुख व सीसीटीएनएस नोडल अधिकारी यांना संबंधित तक्रारींची तत्काळ निर्गती करून अहवाल सादर करण्याच्या सूचना दिल्या आहेत.

काय आहे ई-तक्रार प्रणाली -

नागरिकांना येणाऱ्या अडचणी अगर तक्रारी घरबसल्या देता याव्यात यासाठी शासनाने पोलिस दलाचे स्वतंत्र पोर्टल तयार केले आहे. गेल्या वर्षी कार्यवाही सुरू झाली. या पोर्टलवर आलेली ऑनलाइन तक्रार मुख्यालयात असलेल्या स्वतंत्र कक्षातून संबंधित पोलिस ठाण्यास पाठविली जाते. त्याठिकाणी तक्रारीच्या निवारणाची जबाबदारी विशिष्ट कर्मचाऱ्यावर निश्‍चित केली जाते. त्या कर्मचाऱ्याला तक्रारीच्या अनुषंगाने अधिक माहिती घ्यायची असल्यास त्याला तक्रारदाराचा मोबाईल क्रमांक कळविला जातो. तक्रारीच्या कार्यवाहीची सद्य:स्थिती तक्रारदारास पोर्टलवर दिसते. शिवाय निवारण झाल्यानंतर अंतिम स्थिती तक्रारदारास ऑनलाइन कळविली जाते.

अहवाल सादर करण्याचे आदेश -

मात्र, मागील काही दिवसांपासून दाखल झालेल्या तक्रारींची निर्गती होण्याचे प्रमाण कमी झाल्याचे समोर आले आहे. त्यामुळे प्रलंबित ई-तक्रारीवर योग्य ती कारवाई करून त्या तत्काळ निर्गती करून अहवाल मुख्य कार्यालयास सादर करण्यास सांगितले आहे. यापूर्वीदेखील वारंवार नोटीस व ब्रॉडकास्टद्वारे तक्रारीची निर्गती करून अहवाल सादर करण्यास सांगण्यात आले होते. मात्र, ठाणे उदासीन असल्याचे निदर्शनास आले आहे. त्यामुळे सर्व पोलिस ठाण्याचे वरिष्ठ पोलिस निरीक्षक व सीसीटीएनएस नोडल अधिकारी यांना जातीने स्वतः लक्ष देऊन संबंधितांना योग्य त्या सूचना देऊन अहवाल सादर करण्यास सांगण्यात आले आहे.

सर्वाधिक ई-तक्रारी प्रलंबित -

शहरातील 32 पोलिस ठाणे अंतर्गत तब्बल २८७ ई-तक्रारी प्रलंबित आहेत. त्यातील वारजे माळवाडी, सिंहगड रोड, दत्तवाडी, चंदननगर, चतुःशृंगी, येरवडा, हडपसर, वानवडी, कोंढवा या पोलिस ठाण्यात सर्वाधिक ई-तक्रारी प्रलंबित आहेत. काही ठाण्यांत प्रलंबित तक्रारींची संख्या शून्य आहे.