जानेवारीपासून पणजीत 'पे पार्किंग', महापौर मडकईकरांची माहिती

पे पार्किंगसाठी निविदा काढण्यात आली असून डिसेंबरअखेर पात्र कंपनीशी करार करण्यात येऊन जानेवारीपासून शहरात ' पे पार्किंग' योजना राबवण्यात येणार असल्याची माहिती पणजीचे महापौर उदय मडकईकर यांनी दिली.

पणजी- गोव्याची राजधानी पणजीतील शिस्तबद्ध पार्किंगसाठी जानेवारी महिन्यापासून ' पे पार्किंग' सुरू करणार असल्याची माहिती पणजीचे महापौर उदय मडकईकर यांनी दिली. तसेच वाढत्या कचऱ्याची समस्या सोडवण्यासाठी विविध ठिकाणी कमी क्षमतेचे कचरा व्यवस्थापनाचे प्रयत्न करणार असल्याचे मडकईकर यांनी सांगितले.

हेही वाचा -कुलदीप सेंगर दोषी ठरल्याने भाजपचा खरा चेहरा समोर आला- आमदार मनीषा कायंदे

पालिकेतील आपल्या दालनात आयोजित पत्रकार परिषदेत बोलताना मडकईकर म्हणाले, पे पार्किंगसाठी निविदा काढण्यात आली असून डिसेंबरअखेर पात्र कंपनीशी करार करण्यात येऊन जानेवारीपासून शहरात ' पे पार्किंग' योजना राबवण्यात येणार आहे. तसेच शहरातील काही भागात उभारण्यात आलेल्या वाहतूक व्यवस्थेप्रमाणे 'डिजिटल' पे पार्किंग प्रायोगिक तत्वावर सुरू केले जाणार आहे. उभारण्यात आलेल्या या प्रकल्पांची पाहणी करण्यासाठी नुकताच पालिकेच्यावतीने दौरा करण्यात आला होता.

शहरातील वाढत्या कचऱ्याची समस्या नियंत्रणात आणण्यासाठी पालिकेच्यावतीने तीन टन एवढ्या क्षमतेचे प्रकल्प सुरू करण्याचा प्रयत्न असून यासाठी जागेचा शोध सुरू आहे. एखाद्या खासगी संस्थेच्या मदतीने हे प्रकल्प उभारण्यात येतील, ज्यामधून बायोमिथेनेल तयार केले जाईल. यासाठी भारत सरकारतर्फे तंत्रज्ञान पुरवण्यात येणार आहे, असेही मडकईकर यांनी सांगितले.

स्मार्ट सिटी प्रकल्प आणि पणजी महानगरपालिका यामधील वाद संपुष्टात आला का? असे विचारले असता मडकईकर म्हणाले, मुख्यमंत्र्यांनी स्मार्ट सिटी प्रकल्प राबवणाऱ्या यंत्रणेला पालिका क्षेत्रात कोणतेही नवीन काम करताना पालिकेला विश्वासात घेण्यापूर्वी ते काम करू नये, अशी सक्त ताकीद दिली आहे.

यावेळी उपमहापौर आणि पालिका मुख्याधिकारी संजीत रॉडिग्ज उपस्थित होते.