नाशिक- चिकन खाल्ल्याने कोरोना होतो, या एका अफवेमुळे देशात चिकन उद्योगाला करोडो रुपयांचा फटका बसला. ही बाब आपल्या व्यवसायावर तर येणार नाही ना, या भीतीने सलून व्यवसायिक धास्तवले आहेत. सलून व्यावसायिकांचा रोज अनेक ग्राहकांशी जवळून संपर्क येतो. सलून चालक हे एकच नॅपकिन हा अनेक ग्राहकांना वापरतात. त्यामुळे कोरोना संसर्ग होण्याची शक्यता अधिक असल्याचे मेसेज सध्या सोशल मीडियावर व्हायरल होत आहेत. त्यामुळे संचारबंदीनंतर दुकाने सुरू झाली, तरी ग्राहक येतील का ? असा प्रश्न सलून चालकांना पडला आहे.
नाशिक शहरात 3000 ते 3500 सलून चालक असून तेवढेच लेडीज पार्लर आहेत. या व्यवसायावर निर्भर असणाऱ्या व्यक्तींची संख्या 50 हजार इतकी आहे. मात्र सलून व्यवसाय अडचणीत येतो की काय असा प्रश्न सलून चालकांना पडला आहे. मध्यप्रदेशमध्ये एका सलून चालकामुळे 6 जणांना कोरोनाची लागण झाल्याच्या बातम्या सोशल मीडियावर मोठ्या प्रमाणात पसरल्या. त्यामुळे नागरिकांमध्ये भीतीचे वातावरण आहे. अशा बातम्यामुळे संचारबंदीनंतर ग्राहक सलूनमध्ये येतील की नाही, याची धास्ती सलून चालकांना पडली आहे.