नाशिकरांनी साथ दिली नाही याचे दुःख - राज ठाकरे

राज ठाकरे यांनी मोदी आणि अमित शाह नको म्हणून भाजप आणि सेनेला मतदान करू नका असे म्हटले आहे. शहरात होत असलेल्या राज ठाकरेंच्या सभेत राष्ट्रवादीच्या पदाधिकारी आणि कार्यकर्त्यांनी गर्दी केली आहे.

नाशिक- शहराच्या विकासासाठी महाराष्ट्र नवनिर्माण सेनेने अनेक विकासकामे केली. यात 510 किलो मीटरचे अंतर्गत रस्ते, सर्कल, गोदापार्क, बाळासाहेब ठाकरे स्मारक, बोटॅनिकल गार्डन, घन कचरा प्रकल्प, मुकणे धरणे, पाइप लाइन, उड्डाण पुलाखाली सुशोभीकरण असे अनेक कामाचे फोटो वॉलवर दाखवले. मात्र इतके करुनही नाशिकरांनी साथ दिली नसल्याचे दु:ख असल्याची खंत राज ठाकरे यांनी व्यक्त केली.

राज ठाकरे यांची आज नाशिकमध्ये सभा पार पडली. या सभेत राज ठाकरे यांनी भाजपसह पंतप्रधान मोदींवर जोरदार हल्लाबोल केला. त्यासह त्यांनी नाशिकरांवर नाराजीही व्यक्त केली.

राज ठाकरेंच्या सभेत राष्ट्रवादीच्या पदाधिकारी आणि कार्यकर्त्यांनी गर्दी केली आहे. नाशिकमध्ये लोकसभा निवडणुकीसाठी राष्ट्रवादीकडून समीर भुजबळ उमेदवार आहेत. राज ठाकरे यांनी मोदी आणि अमित शाह नको म्हणून भाजप आणि सेनेला मतदान करू नका असे म्हटले आहे.

राज यांची ही भूमिका राष्ट्रवादीच्या पथ्यावर पडली आहे. समीर भुजबळ यांना उमेदवारी जाहीर होताच नाशिकमधील मनसे पदाधिकारी समीर भुजबळ यांना पाठिंबा देत राष्ट्रवादी काँग्रेसच्या मंचावर दिसून आले.
छगन भुजबळांनाही राज ठाकरे यांची नाशिकमधील ताकद माहीत असून मोठा युवावर्ग राज ठाकरे यांच्या सोबत आहे. म्हणून भुजबळांनीदेखील नाशिकमधील मनसे पदाधिकाऱ्यांच्या घरी जाऊन गाठी भेटी घेतल्या. मनसेची टीमसुद्धा समीर भुजबळ यांच्या प्रचारासाठी कामाला लागल्याचे दिसून आले आहे.

लोकांच्य गरजा काय असतात, हे सांगताना राज ठाकरे म्हणाले की, शहरातील लोकांना चांगली शाळा, कॉलेज, बाजार, चित्रपट गृह, बाग, मैदान पाहिजे, तर ग्रामीण भागातील लोकांना वीज, पाणी पाहिजे असेही ते म्हणाले. नाशिक एकमेव शहर आहे, भारतात जिथे टाटा, रिलायन्स, महिंद्रांनी शहराच्या विकासासाठी पैसे टाकल्याचेही राज ठाकरे यांनी यावेळी सांगितले.