नाशिक - अरबी समुद्रात आलेल्या तौक्ते चक्रीवादळाने नाशिक जिल्ह्याला मोठा तडाखा दिला आहे. यामध्ये १ हजार ६५२.६१ हेक्टरवरील पिके व फळबागा आडव्या झाल्या आहेत. जिल्हा प्रशासनाने युद्धपातळीवर पंचनामे पूर्ण केले असून 2 कोटी ९६ लाख ६१ हजारांचे नुकसान झाले आहे. जिल्हा प्रशासनाने हा नुकसानीचा अहवाल राज्यशासनाला पाठवला आहे. अस्मानी संकटाने हतबल झालेल्या शेतकर्‍यांच्या नजरा आता शासनाच्या मदतीकडे लागल्या आहेत.
१,६५२ हेक्टरवरील पिके, फळबागा उद्ध्वस्त
गतवर्षीच्या निसर्ग चक्रिवादळानंतर यंदा पश्चिम किनारपट्टीवर तौक्ते वादळ धडकले. नाशिक जिल्ह्यातही त्याचा परिणाम पहायला मिळाला. सलग तीन दिवस सोसाट्याच्या वादळी वार्‍यासह अनेक तालुक्यांमध्ये मुसळधार पाऊस पडला. तुलनेने पश्चिम किनारपट्टीच्या जवळ असलेल्या त्र्यंबकेश्वर, पेठ, सुरगाणा, दिंडोरी या तालुक्यांना या वादळाचा तडाखा बसला. अनेक घरांची पडझड झाली. काही ठिकाणी घराचे पत्रे, कौले उडाल्याने घरांचे अंशत: नुकसान झाले. सुदैवाने जीवित व पशूहानी झाली नाही. मका, बाजरी, कांद्यासह भाजीपाल्याचे अतोनात नुकसान झाले. सर्वाधिक तडाखा हा आंबा, पेरू, डाळींब या फळबागांना बसला. एकूण १ हजार ६५२ हेक्टरवरील पिके व फळबागा उद्ध्वस्त झाल्या आहेत.