विदर्भातील पहिला बालस्नेही कक्ष सीताबर्डी पोलीस ठाण्यात सुरू, मुलांना तणावपूर्ण वातावरणापासून दूर ठेवण्यासाठी उपक्रम

नागपूर शहरातील सीताबर्डी पोलीस ठाण्याच्या आवारात विदर्भातील सर्वात पहिले बालस्नेही आणि महिला अधिकारी कक्ष स्थापन करण्यात आले आहेत. आज या दोन्ही कक्षाचे उदघाटन पोलीस आयुक्त अमितेशकुमार, अप्पर पोलीस आयुक्त दिलीप झलके यांच्या हस्ते करण्यात आले.

नागपूर -नागपूर शहरातील सीताबर्डी पोलीस ठाण्याच्या आवारात विदर्भातील सर्वात पहिले बालस्नेही आणि महिला अधिकारी कक्ष स्थापन करण्यात आले आहेत. आज या दोन्ही कक्षाचे उदघाटन पोलीस आयुक्त अमितेशकुमार, अप्पर पोलीस आयुक्त दिलीप झलके यांच्या हस्ते करण्यात आले. वि सेवन फाउंडेशनच्या सहकार्याने बालस्नेही कक्षाला लहान मुलांचा विरंगुळा होईल, यादृष्टीने सजवण्यात आले आहे

सीताबर्डी पोलीस स्टेशन हे नागपूर शहरातील सर्वात जुने व मध्यवर्ती ठिकाणी असलेले एकमेव पोलीस स्टेशन आहे. सध्याची सीताबर्डी पोलीस स्टेशनची वाटचाल "स्मार्ट पोलीस स्टेशन" च्या दिशेने होत आहे. या अंतर्गत पोलीस उपायुक्त विनीता साहू यांच्या संकल्पनेतुन सीताबर्डी पोलीस स्टेशनकडून एक नाविन्यपूर्ण उपक्रम हाती घेण्यात आलेला आहे. या उपक्रमान्वये पोलीस स्टेशनच्या आवारात स्वतंत्र खोलीमध्ये लहान मुलांना आवडेल, असा बालस्नेही कक्ष तयार करण्यात आलेला आहे. खास बालकांसाठी अशाप्रकारची सुविधा असलेले हा विदर्भातील पहिलाच उपक्रम आहे.

विदर्भातील पहिला उपक्रम -

संपूर्ण विदर्भातील हे पहिले पोलीस स्टेशन आहे. अनेक महिला तक्रारदार, पोक्सो गुन्हयामधील साक्षीदार, पीडित महिला, विधी संघर्शित बालक, हरवून सापडलेली बालके, सासरकडून जाच असलेल्या महिला इ. लोक पोलीस स्टेशन येथे येत असतात. तेव्हा पोलीस स्टेशनमधील वातावरण हे त्यांना कोणत्याही भिती अथवा दडपणाशिवाय तक्रार देण्यायोग्य बनविणे हा या उपक्रमाचा मुख्य हेतू आहे.

विदर्भातील पहिला बालस्नेही कक्ष सीताबर्डी पोलीस ठाण्यात सुरू

लहान मुलांसाठी विशेष व्यवस्था -

पीडित तक्रारदार बालकांसह पोलीस स्टेशनला आल्यावर लहान मुलांच्या मनावर ताण येवून विपरीत परिणाम होण्याची किंवा सदरची बालके घाबरण्याची शक्यता असते, अशा वातावरणापासून दूर राहण्याकरीता स्वतंत्र जागेमध्ये "बालस्नेही कक्ष" करण्यात येत आहे. सदर कक्षामध्ये विविध प्रकारची खेळणी, पुस्तके, कार्यपत्रिका, विविध रंग, घसरगुंडी, पाळणा ईत्यादि मुलांना आवडणाऱ्या वस्तू उपलब्ध करून दिलेल्या आहेत. या कक्षामध्ये स्वतंत्र बेड, सार्वजनिक संगोपन केंद्र, बाळांना अंगावर दुध पाजण्यासाठी स्वतंत्र व्यवस्था, प्रसाधन इत्यादी व्यवस्था करण्यात आलेली आहे. तणावपूर्ण परिस्थितीपासून लहान बालकांचे कोमल मन दूर रहावे हा मुख्य उद्देश आहे. सदर कक्षाची विभागणी वेगवेगळया झोनमध्ये करण्यात आलेली आहे. ( उदा - वाचन विभाग, उपक्रम विभाग, विश्राम विभाग) याशिवाय पोलीस स्टेशनमध्ये कर्तव्य बजावणाऱ्या महिला अंमलदार यांच्या बालकांना खेळण्यासाठी जागा उपलब्ध झाल्याने संबधित अंमलदार त्यांचे कर्तव्य व्यवस्थित बजावतील. लहान मुलांचे मानसशास्त्र लक्षात घेवून या कक्षाची सजावट करण्यात आली आहे.