नागपूर -नागपूर शहर पोलीस भरती घोटाळ्याची चौकशी सुरू आहे, मात्र या घोटाळ्यात कोणतीही टोळी सक्रिय नसल्याचे तपासात निष्पन्न झाल्याचा दावा नागपूर शहराचे पोलीस आयुक्त अमितेशकुमार यांनी केला आहे. काही उमेदवारांनी संगनमत करून डमी उमेदवार परीक्षेला बसवले होते का, अशी शंका उपस्थित झाली असून त्याअनुषंगाने चौकशी सुरू आहे. या प्रकरणात आणखी आठ ते दहा उमेदवार पोलिसांच्या रडारवर आले असल्याची माहिती पोलीस अधीक्षकांनी दिली आहे.
नागपूर शहराचे पोलीस आयुक्त अमितेशकुमार
गेल्या काही दिवसांपासून नागपूर शहरात पोलीस भरती घोटाळा चांगलाच गाजतो आहे. ऑक्टोबर ते डिसेंबर 2021 कालावधीत पोलीस शिपाई, वाहन चालक पदासाठी भरती प्रक्रिया राबवण्यात आली होती. शाररीक आणि बौद्धिक परीक्षेत काही उमेदवारांनी स्वतःच्या जागी डमी उमेदवार बसवून नोकरी मिळवण्याचा प्रयत्न चालवला होता, मात्र गुन्हे शाखा पथकाला या घोटाळ्याची चाहूल लागली. परीक्षेचा निकाल जाहीर होण्यापूर्वीच गुन्हे शाखेने तिघांना औरंगाबाद येथून अटक केली आहे. ते तिघेही औरंगाबाद येथीलच निवासी आहेत.