Wine At Supermarket : सुपर मार्केटमध्ये वाईन, भाजपचा विरोध, तर तरुणांच्या संमिश्र प्रतिक्रिया

राज्य सरकारने सुपर मार्केटमधून वाईनची ( Wine Sale In Supermarket ) विक्री करण्यास परवानगी देण्याचा निर्णय घेतला आहे. याला विरोधीपक्ष असलेल्या भाजपकडून जोरदार विरोध होत ( BJP Opposes Wine At Supermarket ) असताना, तरुणांच्या मात्र संमिश्र प्रतिक्रिया येत आहेत.

मुंबई - सुपर मार्केटमध्ये वाइन विक्रीस ( Wine Sale In Supermarket ) परवानगी देण्याचा निर्णय मंत्रिमंडळाच्या बैठकीत काल घेण्यात आल्यानंतर आता या निर्णयाबद्दल विरोधकांनी आक्रमक पवित्रा घेतला ( BJP Opposes Wine At Supermarket ) आहे. तर दुसरीकडे तरुण वर्गामध्ये या निर्णयावर संमिश्र प्रतिक्रिया बघायला मिळत आहेत.

दारू सम्राटासाठी अर्थपूर्ण व्यवहार!

राज्यातील द्राक्ष बागायतदार तसेच वाईन उद्योगास चालना देण्यासाठी आता सुपरमार्केटमध्ये सुद्धा वाईन विक्रीस परवानगी देण्याचा निर्णय राज्य सरकारने घेतला. या निर्णयाचा भाजपने कडाडून विरोध केला आहे. हा निर्णय म्हणजे निर्लजपणाचा कळस असून, सत्तेची धुंदी व झिंग या सरकारला चढली आहे, असा आरोप विरोधी पक्षनेते प्रवीण दरेकर यांनी केला आहे. दारूविषयी सरकारला इतकं प्रेम आहे तर, शेतकऱ्यांच्या खांद्यावर बंदूक कशाला ठेवता? असा प्रश्नही त्यांनी उपस्थित केलेला आहे. सध्या शेतकरी अवकाळी पाऊस, दुष्काळ, कोरोना महामारी या कारणाने त्यांचे आर्थिक नुकसान मोठ्या प्रमाणात झालेले आहे. शेतकरी उध्वस्त झाला आहे. अशात खासदार संजय राऊत यांनी सांगावे की, त्यांनी शेतकऱ्यांना किती पैसे दिले. कोविडमध्ये इतर राज्यांनी शेतकऱ्यांना मदत केली. पण महाराष्ट्राने शेतकऱ्यांना काहीच दिले नाही. शेतकऱ्यांचे प्रेम हे पुतना- मावशीचे प्रेम आहे, असेही दरेकर म्हणाले. सुपरमार्केटमध्ये वाईन विक्रीस परवानगी म्हणजे दारू सम्राटांसाठी अर्थपूर्ण व्यवहार करून केलेली ही गोष्ट आहे. दारू निर्मिती करणारे व दारू विक्री करणारे यांच्यासाठी घेतलेला हा निर्णय असल्याचा आरोपही दरेकर यांनी केला आहे. मुंबईतील ज्या स्टॉलमध्ये दारू विकली जाईल ती स्टॉल शेतकऱ्यांच्या मुलांना देणार का? शेतकऱ्यांच्या भलाईसाठी हा एकमेव मार्ग आहे का? असाही सवाल दरेकर यांनी उपस्थित केला आहे.

वाईन शॉप मध्ये जायची भीती नाही, तर कुटुंबासोबत वाईन कशी खरेदी करायची?

प्रामुख्याने द्राक्ष बागायतदार, शेतकऱ्यांना फायदा व्हावा तसेच वाइन उद्योगाला चालना मिळावी या हेतूने हा निर्णय घेण्यात आल्याचे सांगण्यात आले आहे. राज्यात मोठ्या प्रमाणात वाईन तयार होत आहे. यामध्ये वाईनचे विविध प्रकार असतात व वाईन पिणारे यांचा एक वर्गही आहे. सरकारच्या निर्णयाबाबत तरुण वर्गामध्ये संमिश्र प्रतिक्रिया बघायला भेटतात. मुंबईतील चेतन कांबळे व चंदन कुमार हे युवक सरकारच्या या निर्णयाचं स्वागत करतात. त्यांच्या सांगण्याप्रमाणे वाईन आता सहज सुपरमार्केटमध्ये उपलब्ध होत असल्याकारणाने त्यांना या अगोदर वाईन शॉपमध्ये जाऊन वाईन घ्यायची जी भीती वाटत होती ती आता राहणार नाही. त्याचबरोबर महत्त्वाचं म्हणजे वाईनकडे दारू म्हणून न बघता ते एक एनर्जी ड्रिंक आहे, असं समजून सुपर मार्केट मधून दुकानातून ते घेतल जाऊ शकत. नाहीतर वाईन शॉपमध्ये वाइन घ्यायला गेल्यास आपण दारू घेत आहोत असं त्यांना वाटायचे. थोडक्यात वाईनला दारूचा दर्जा द्यायला हे युवक तयार नाहीत.

युवा पिढी बरबाद होण्याची शक्यता

तर दुसरीकडे पांडुरंग ठोंबरे व दानिश खाटीक या मुंबईतील युवकांनी सरकारच्या या निर्णयाचा विरोध केला आहे. पांडुरंग ठोंबरे यांच्या म्हणण्याप्रमाणे या निर्णयाने राज्यातील युवा वर्ग चुकीच्या मार्गावर जाऊ शकतो. एक युवा पिढी बरबाद होऊ शकते. दानिश खाटीक सांगतात की, वाईन शॉपमध्ये फक्त मोठी व्यक्ती ही दारु आणण्यासाठी किंवा खरेदी करण्यासाठी जात असते. परंतु सुपरमार्केटमध्ये आपण आपल्या पूर्ण कुटुंबासोबत जात असतो. तिथे वाईन खरेदी करताना आपल्यासोबत असलेल्या मुलांच्या मनावर याचे वाईट परिणाम होऊ शकतात, याची भीती ही असणार आहे.