मुंबई - राज्यात कोरोनाने 9 मार्च 2020 ला प्रवेश करून आज वर्ष पूर्ण झाले आहे. या एका वर्षाच्या काळात कोरोनामुळे सर्वच क्षेत्रांना जबर फटका बसला आहे. कोरोनाचे सर्वाधिक रुग्ण देशात असल्याने राज्यातील अनेक नागरिकांना प्राण गमवावे लागले आहेत.
कोरोनाने राज्यात शिरकाव करून वर्ष पूर्ण होत असताना या महामारीची दुसरी लाट थोपविण्याचे आव्हान आहे. याबाबत इंडियन मेडिकल असोसिएशनचे माजी अध्यक्ष अविनाश भोंडवे म्हणाले की, एका वर्षाचा इतिहास हा अत्यंत कडवट आहे. हा आजार नेमका काय आहे, याचे निदान कसे होते ? याच्यावर उपचार काय आहेत, याची कोणतीही कल्पना डॉक्टरांना नव्हती. पहिला रुग्ण सापडल्यानंतर कोरोनाने संपूर्ण महाराष्ट्रात वेगाने हातपाय पसरायला सुरुवात केली.
भारतीयांमध्ये सामुहिक प्रतिकारक्षमता निर्माण होण्याची शक्यता-
सरकारी रुग्णालयात रुग्णांना जागा नव्हती. 25 मार्चपासून 21 दिवसांचा पहिली टाळेबंदी जाहीर केली. टाळेबंदीमध्ये नेमके काय करावे, याची कल्पना नागरिकांना नव्हती. मास्क का घालावा ? सोशल डिस्टन्सिंग म्हणजे काय ? हात धुवण्याचे महत्त्व नागरिकांना माहित नव्हते. वैद्यकीय क्षेत्राने रुग्णांवर उपचार करायला सुरुवात केली. हळूहळू उपचार होत गेले. रुग्ण बरे होत गेले. मात्र सप्टेंबर व ऑक्टोबर च्या दरम्यान रुग्णांची संख्या प्रचंड वाढली. सप्टेंबरच्या 18 तारखेला २३ हजार रुग्ण एकाच दिवशी सापडले. डॉक्टर आणि प्रशासनाच्या प्रयत्नांना यश येऊन ही कोरोनाची लाट काही प्रमाणात थोपवण्यात यश आले. त्यातच कोरोनाची लस आली आहे. लसीकरणाची मोहिम पुढील सहा महिने चालूचर राहणार आहे. 70 टक्के लसीकरण झाल्यानंतर भारतीयांमध्ये सामुहिक प्रतिकारक्षमता निर्माण होईल. त्यामधून कोरोना नष्ट होईल. सध्या, मागील काही दिवसांपासून रुग्ण संख्या वाढत आहे. ही रुग्णसंख्या आटोक्यात येईल, असा विश्वास डॉक्टर अविनाश भोंडवे यांनी ईटीव्ही भारतशी बोलताना व्यक्त केला आहे.
हेही वाचा-कांदा, लसूण, मसाला फोडणीसह कालव्याचा रस्सा ही पर्यटकांसाठी पर्वणी
अशी आहे मुंबईमधील स्थिती-
मुंबईत गेल्या महिनाभरात कोरोना रुग्णांची संख्या वाढत आहे. मात्र चाचण्यांच्या प्रमाणात पॉझिटिव्ह येणाऱ्या रुग्णाचे प्रमाण कमी आहे. यामुळे सध्या तरी लॉकडाऊनचा विचार नाही. मात्र मुंबईकरांनी नियम पाळले नाहीत, नागरिकांनी सहकार्य केले नाही, आणि रुग्णसंख्या अशीच वाढत राहिली तर मात्र अंशता लॉकडाऊनचा विचार करण्यात येईल, असा इशारा मुंबई महापालिकेने दिला आहे. मुंबईकरांनी कोरोनाच्या त्रिसूत्रीची अंमलबजावणी करण्याचे आवाहन मुंबई महापालिकेने केले आहे.
हेही वाचा-मनसुख हिरेन, खासदार मोहन डेलकर आत्महत्या प्रकरणावरून विधानसभेत गोंधळ
मुंबईत गेले अकरा महिने कोरोनाचा प्रसार आहे. हा प्रसार काही प्रमाणात कमी झाला असतानाच पुन्हा रुग्ण संख्या वाढत आहेत. त्यावर मुंबई शहरचे पालकमंत्री अस्लम शेख यांनी मुंबईत अंशता लॉकडाऊन लावावा लागेल असे म्हटले आहे. रुग्ण आढळून येणाऱ्या विभागात इमारती आणि चाळी सील केल्या आहेत. एकाच ठिकाणी रुग्णसंख्या वाढली तर कंटेन्टमेंट झोनची कडक अंमलबजावणी केली जाईल. त्यासाठी पालिकेने तयारी ठेवली आहे अशी माहिती पालिकेचे अतिरिक्त आयुक्त सुरेश काकाणी यांनी दिली. रुग्णसंख्या अशीच वाढत राहिली तर, रुग्ण आढळून येणाऱ्या विभागात अंशतः टाळेबंदी लावावी लागू शकते, असा इशाराही काकाणी यांनी दिला आहे.
मुंबईत कोरोना रुग्णांची आकडेवारी -
मुंबईत काल सोमवारपर्यंत कोरोनाबाधितांचा आकडा 3 लाख 34 हजार 572 वर पोहचला आहे. मृतांचा आकडा 11 हजार 504 वर पोहचला आहे. रुग्ण बरे होण्याची संख्या 3 लाख 11 हजार 407 वर पोहचली आहे. मुंबईत सध्या 10 हजार 779 सक्रिय रुग्ण आहेत. रुग्ण बरे होण्याचे प्रमाण 93 टक्के असून रुग्ण दुप्पटीचा कालावधी 225 दिवस इतका आहे. कोरोना रुग्णांचा शोध घेण्यासाठी आतापर्यंत 34 लाख 34 हजार 610 चाचण्या करण्यात आल्या आहेत.
मुंबईमधील लसीकरणाची आकडेवारी
मुंबईत 16 जानेवारीपासून आतापर्यंत 3 लाख 90 हजार 938 लाभार्थ्यांना लस देण्यात आली आहे. त्यात 1 लाख 62 हजार 598 आरोग्य कर्मचारी, 1 लाख 11 हजार 78 फ्रंटलाईन वर्कर, 1 लाख 5 हजार 867 ज्येष्ठ नागरिक तर 45 ते 59 वयातील गंभीर आजार असलेल्या 11 हजार 395 लाभार्थ्यांना लस देण्यात आली आहे.