मुंबई -काँग्रेसच्या अनेक नेत्यांनी फोन करून कळवलं आहे की, त्यांना राज्यात परिवर्तन हवंय. त्यांना सेनेचे सरकार हवंय, याबद्दल मी त्यांचा आभारी आहे, असे मत शिवसेना नेते संजय राऊत यांनी आज व्यक्त केले. राऊत पुढे म्हणाले, की संपूर्ण महाराष्ट्राचीच अशी इच्छा आहे, यावेळी भाजपचा नाही, तर शिवसेनेचाच मुख्यमंत्री हवा.
'ज्याच्याकडे बहुमत आहे तो सरकार बनवेल, भाजपने तसा दावा केला तर आनंदच'
भाजप मुख्यमंत्रीपद शिवसेनेला देणार नाही, ही त्यांच्या पक्षाची वैयक्तीक भूमीका आहे. उद्या १४५ आमदारांची यादी घेऊन सत्तास्थापनेसाठी भाजप राज्यपालांकडे गेले, तर त्यामध्ये आम्हाला दुःख व्हायची कोणतीही बाब नाही. ज्याच्याकडे बहुमत आहे, तो सरकार बनवेल आणि मुख्यमंत्रीपदही त्याच्याकडे राहील, त्याच्यात कोणी काय करू शकते? असे संजय राऊत यांनी स्पष्ट केले.