वर्दीतील दर्दी.. रेहाना शेख यांनी जपली 'खाकी'तली माणूसकी

पोलीस म्हटलं की सामान्य नागरिकांच्या कपाळावर या आठ्या पडत असतातच. पोलीस म्हणजे भ्रष्ट, पोलीस म्हणजे चिरीमिरी घेणारे असा समज नागरिकांमध्ये असताना या उलट महिला पोलीस कर्मचारी रेहाना नासीर शेख यांनी एक आदर्श समाजासमोर घालून दिलेला आहे.

मुंबई - पोलीस म्हटलं की सामान्य नागरिकांच्या कपाळावर या आठ्या पडत असतातच. पोलीस म्हणजे भ्रष्ट, पोलीस म्हणजे चिरीमिरी घेणारे असा समज नागरिकांमध्ये असताना या उलट महिला पोलीस कर्मचारी रेहाना नासीर शेख यांनी एक आदर्श समाजासमोर घालून दिलेला आहे. मुंबई पोलीस खात्यात महिला पोलीस नाईक पदावर काम करणाऱ्या रेहाना नासीर शेख यांच्याकडून रायगड जिल्ह्यातील धामणी येथील ज्ञानाई विद्यालयातील या 50 मुलांना शैक्षणिक मदत म्हणून दत्तक घेण्यात आलेले आहे. कोरोना संक्रमणाच्या महामारीत या महिला पोलीस कर्मचाऱ्याने आतापर्यंत 54 जणांना प्लाज्मा उपलब्ध करून दिलेला असून याबरोबरच ऑक्सिजन व बेड मिळवून देण्याची मोलाची कामगिरी त्यांनी बजावली आहे. त्यामुळे मुंबई पोलीस खात्यात सर्वत्र त्यांचे कौतुक होत आहे.

रेहाना नासीर शेख यांचे पती हे ही मुंबई पोलीस खात्यात असून रेहानाचे वडील हे मुंबई पोलीस खात्यातून पोलीस उपनिरीक्षक पदावरून निवृत्त झालेले आहेत. पोलीस खात्यात काम करत असताना पोलिसांची कर्तव्य कशाप्रकारे बजावली जातात याचे बाळकडू त्यांना त्यांच्या घरातूनच मिळालेले होत. कोरोना या सारख्या महामारीत त्यांना पोलीस खात्यातील काही जणांना प्लाज्मा हवा असल्याचे कळल्यानंतर त्यांनी स्वतःहून यात पुढाकार घेत पोलीस कर्मचाऱ्यांच्या नातेवाईकांना प्लाज्मा उपलब्ध करून दिला असून रेहाना यांना येणाऱ्या फोन कॉल्सवर ऑक्सीजन व बेड उपलब्ध करून देण्याची विनंती आली असता त्या सर्व पूर्ण करण्याचा त्या प्रयत्न करत आहेत.

देशाची आर्थिक राजधानी मुंबई शहराची सुरक्षा करण्यासाठी कंबर कसणाऱ्या मुंबई पोलीस खात्याकडून कोरोना सारख्या महा मारीत नागरिकांना कुठलाही त्रास होऊ नये व त्यांना उपचारासाठी योग्य त्या सुखसोयी मिळाव्यात म्हणून प्रयत्न केले जात आहेत. रेहाना नासीर शेख यांच्या या कामगिरीची दखल घेत मुंबई पोलीस आयुक्त हेमंत नगराळे यांच्या कडून रेहाना नासीर शेख यांना विशेष पारितोषिक व प्रशस्तीपत्र देऊन गौरविण्यात आले आहे.

31 पोलीस कर्मचारी, 22 नागरिक व 1500 अधिक बेड ऑक्सिजन केले उपलब्ध -

मुंबई पोलीस खात्यातील 32 पोलीस कर्मचारी व त्यांच्या कुटुंबियांना प्लाझ्मा रेहाना शेख यांनी उपलब्ध करुन दिला असून 22 नागरिकांना प्लाझ्मा उपलब्ध करून दिला आहे. तर तब्बल दीड हजाराहून अधिक नागरिकांना ऑक्सिजन व बेडची उपलब्धता त्यांनी करून दिली आहे. एवढंच नाही तर व्हॉलीबॉल सारख्या स्पर्धेत महाराष्ट्र पोलिसांचे त्यांनी नेतृत्व केलेले आहे. सध्याच्या घडीला गरीब नागरिकांकडे उपजीविकेचं साधन उपलब्ध नसून त्यांच्या दोन वेळच्या जेवणाचा प्रश्न निर्माण झालेला आहे. अशात प्रत्येक नागरिकाने स्वतःहून पुढे येऊन या काळात अशा गरीब व्यक्तींना शक्य तेवढी मदत करावी, असे आवाहन त्यांनी नागरिकांना केले आहे.