सिंगापूर पोलिसिंगचे महाराष्ट्र पोलिसांना सहकार्य मिळणार, गृहमंत्र्यांच्या भेटीनंतर वाणिज्यदूतांची ग्वाही

सायबर क्राईम आणि फॉरेन्सिक सायन्समध्ये सिंगापूर पोलिस वापरत असलेल्या तंत्रज्ञानाची माहिती आणि सहकार्य महाराष्ट्र पोलिसांनाही करुन द्यावे यासंबंधी राज्याचे गृहमंत्री दिलीप वळसे पाटील आणि सिंगापूरचे वाणिज्यदूत चेओंग मिंग फूंग यांच्यात चर्चा झाली.

मुंबई - सिंगापूर गणराज्याचे मुंबईतील नवनियुक्त वाणिज्यदूत चेओंग मिंग फूंग यांनी गृहमंत्री दिलीप वळसे पाटील यांची सोमवारी मंत्रालयात सदिच्छा भेट घेतली. महाराष्ट्र पोलिसांना पोलिसिंगसाठी आवश्यक ते सर्व सहकार्य करण्यासाठी प्रयत्नशील राहू अशी ग्वाही वाणिज्यदूत चेओंग मिंग फूंग यांनी दिल्याचे गृहमंत्र्यांनी सांगितले.

गृहमंत्री दिलीप वळसे पाटील आणि सिंगापूरचे वाणिज्यदूत चेओंग मिंग फूंग यांच्यात चर्चा

सायबर क्षेत्रातील वाढती गुन्हेगारी हे सर्वांसाठी मोठे आव्हान आहे. सायबर गुन्हेगारीला आळा घालण्यासाठी महाराष्ट्र पोलिस नवनवीन तंत्रज्ञानाचा वापर करीत आहे. सायबर गुन्हेगारी आणि फॉरेन्सिक सायन्स या अनुषंगाने महाराष्ट्र पोलिसांना सहकार्य मिळावे, तसेच उभय देशातील संबंध अधिक वृद्धिंगत व्हावेत अशी अपेक्षा गृहमंत्री वळसे पाटील यांनी यावेळी व्यक्त केली.पुढील आठवड्यात सिंगापूर विमानसेवा लसीकरण पूर्ण झालेल्या प्रवशांसाठी सुरु होत आहे. यासाठीही मुंबई पोलिसांचे सहकार्य मिळावे, असे ही वाणिज्यदूत चेओंग मिंग फूंग यांनी सांगितले. तसेच सिंगापूर राज्यातील कायदा व सुव्यवस्था, गुन्हेगारी, कम्युनिटी पोलिसिंग तसेच पोलिसांची कार्यपद्धती या बाबत सविस्तर चर्चा झाली. यावेळी गृह विभागाचे अपर मुख्य सचिव मनुकुमार श्रीवास्तव उपस्थित होते.