मुंबई/पुणे- राज्यात मशिदीवरील भोंगे आणि हिंदुत्वाच्या मुद्यावर राज ठाकरे सध्या आक्रमक झाले आहेत. नुकतेच आयोध्या दौऱ्यावर जाण्याची राज यांनी घोषणा केली. मात्र, ज्या अयोध्यावरून राज ठाकरेंनी व्यंगचित्राच्या माध्यमातून शिवसेना पक्षप्रमुख उद्धव ठाकरे यांच्यावर टीका केली होती. शिवसेनेने त्याच राज ठाकरेंवर निशाणा साधला आहे. त्यामुळे राज ठाकरेंचे व्यंगचित्र मनसेवर बूमरँग झाल्याचे दिसून येत आहे.
मनसेवर बूमरॅंग - गुढीपाडव्या मेळाव्यापासून राज ठाकरे यांनी हिंदुत्वाच्या मुद्द्याकडे कूच केल्याचे दिसत आहे. मशिदीवरील भोंगे असो किंवा हनुमान चालीसा पठणवरून मनसे आक्रमक झाली आहे. एरवी भगवी शाल कधीही परिधान न करणारे राज ठाकरे पुण्यात केलेल्या महाआरतीवेळी शाल पांघरलेले पाहायला मिळाले. तसेच मनसेच्या कार्यकर्त्यांनी राज ठाकरेंना हिंदू जननायक अशी पदवी बहाल केली. अनेक ठिकाणी तसे बॅनर लावण्यात आले. येत्या पाच मे रोजी राज ठाकरे यांनी आयोध्या दौऱ्यावर जाणार आहेत. या दौऱ्यावरून शिवसेनेनेही राज ठाकरे यांनीच काढलेल्या व्यंगचित्रातून टीका केली आहे. शिवसेना पक्षप्रमुख उद्धव ठाकरे आयोध्या दौऱ्यावर गेले असताना राज ठाकरेंनी व्यंगचित्राच्या माध्यमातून आसूड ओढला होता. हेच व्यंगचित्र शिवसेनेने वायरल करत मनसेला फटकारले आहे.
काय म्हटलंय शिवसेनेने -'अशी वेळ कोणावरही येऊ नये, उद्धव साहेब ठाकरेंच्या आयोध्या दौऱ्याला आणि श्री राम मंदिराला विरोध करून व्यंगचित्र काढणारे राज ठाकरेंना शेवटी अयोध्येत जाणार आहेत. सोयीनुसार आणि सुपारी नुसार पोकळ हिंदुत्व...' अशी खोचक टीका शिवसेनेकडून करण्यात आली आहे.