मुंबई : शिक्षण समिती अध्यक्षपदी शिवसेनेच्या संध्या दोशींची निवड; भाजपची दोन मते फुटली

मुंबई महापालिकेच्या शिक्षण समितीच्या निवडणुकीत शिवसेनेच्या उमेदवारानेच बाजी मारली आहे. विरोधी पक्ष असलेल्या भाजपच्या दोन सदस्यांनीही निवडणुकीत शिवसेनेला सहकार्य केले आहे.

मुंबई- मुंबई महापालिकेच्या शिक्षण समितीच्या अध्यक्षपदाच्या निवडणुकीत शिवसेनेच्या संध्या दोशी विजयी झाल्या आहेत. या निवडणुकीत काँग्रेसने उमेदवारी अर्ज मागे घेत निवडणुकीदरम्यान तटस्थ भूमिका घेतली. तर राष्ट्रवादी आणि समाजवादीने शिवसेनेला मतदान केले. मात्र, या निवडणुकीत भाजपची दोन मते फुटली आहेत.

भाजपच्या दोन सदस्यांनी शिवसेनेला मतदान केल्याने ती मते अवैध ठरली आहेत. या दोन्ही सदस्यांवर कारवाई केली जाणार असल्याची माहिती भाजपकडून देण्यात आली.

शिक्षण समिती अध्यक्षपदासाठी शिवसेनेने संध्या दोशी यांनी उमेदवारी दिली. भाजपकडून सुरेखा पाटील यांनी तर काँग्रेसकडून संगीता हंडोरे यांनी अर्ज भरला होता. शिक्षण समितीत शिवसेना 11, भाजप 9, काँग्रेस 4, राष्ट्रवादी 1, समाजवादी पक्ष 1 असे सदस्य आहेत. शिक्षण समितीचीच्या अध्यक्षपदाच्या निवडणुकीत एकूण 26 मतदान झाले.

शिवसेनेच्या संध्या दोषी यांना शिवसेनेची-11, राष्ट्रवादीचे 1, समाजवादी पक्षाचे 1 अशी एकूण 13 मते मिळाली आहेत. काँग्रेसचे 4 सदस्य तटस्थ राहिले. तर 3 मते अवैध ठरली. त्यात भाजपाच्या बिंदू त्रिवेदी व योगिता कोळी यांची दोन मते अवैध ठरली. या दोन्ही भाजपच्या सदस्यांनी शिवसेनेच्या उमेदवाराला मतदान केल्याने त्यांची मते अवैध ठरली आहेत. तर 2 मते अवैध ठरल्याने भाजपला 7 मते मिळाली आहेत.

शिवसेनेच्या संध्या दोशी यांची अध्यक्षपदी निवड झाल्याची घोषणा महापौर किशोरी पेडणेकर यांनी केली.

दरम्यान भाजपाच्या बिंदू त्रिवेदी व योगिता कोळी यांनी पक्षाचा व्हीप झुगारून शिवसेनेच्या उमेदवाराला मतदान केले आहे. त्यांच्यावर पक्षाकडून कारवाई केली जाणार असल्याची माहिती भाजपकडून देण्यात आली आहे.