मुंबई - खासदार नवनीत राणा आणि आमदार रवी राणा यांना पोलिसांनी अटक केली आहे. दरम्यान, त्यांना भेटायला आलेले भाजपा नेते किरीट सोमय्या यांच्या गाडीवर संतप्त शिवसैनिकांनी हल्ला केला. खार पोलीस ठाण्यातून बाहेर पडताच हा हल्ला झाला आहे. ( Shiv Sena Attack Somaiya Car ) दरम्यान या प्रकरणी सोमय्या यांनी बांद्रा पोलीस ठाण्यात तक्रार दिली.
राणा दाम्पत्याला अटक - मुख्यमंत्री उद्धव ठाकरे यांच्या मातोश्री या निवासस्थानी हनुमान चालीसा पठण करण्याचे आवाहन खासदार नवनीत राणा व आमदार रवी राणा यांनी दिले होते. मुंबईत दोन दिवस शिवसैनिक मातोश्रीला सुरक्षा देत होते. त्याचवेळी राणा यांच्या खार येथील निवासस्थानी शिवसैनिक चाल करून गेले होते. राणा यांना कालच पोलिसांनी 149 ची नोटीस दिली होती. आज त्यांनी रविवारी पंतप्रधान नरेंद्र मोदी मुंबईत येत असल्याने माघार घेतली होती. मात्र, राणा यांच्या विरोधात खार पोलीस ठाण्यात शिवसेनेकडून तक्रार दाखल केल्यावर आज राणा दाम्पत्यांना अटक केली आहे.