मंत्रालय परिसरात 'शांतता, मराठीचे कोर्ट चालू आहे..'
मराठी भाषा संवर्धनासाठी राज्य सरकारच्यावतीने अनेक उपक्रम राबवले जात आहेत. त्यादृष्टीने आज मंत्रालयात शांतता मराठी कोर्ट चालू आहे हा लघुपट दाखण्यात आला. हा लघुपट मंत्रालयात आठवडाभर पाहता येणार आहे.
marathi documentary at mantralaya
मुंबई - मराठीच्या जनजागृतीसाठी मराठी भाषा विभागाच्यावतीने तयार करण्यात आलेला ‘शांतता, मराठीचे कोर्ट चालू आहे’, हा लघुपट आजपासून मंत्रालय परिसरात दाखविण्यात येत आहे. तसेच अभिजात मराठीची महती सांगणारे प्रदर्शनदेखील मंत्रालय परिसरात भरविण्यात आले आहे. मराठी भाषा मंत्री सुभाष देसाई यांच्या हस्ते या दालनाचे उद्घाटन करण्यात आले. यावेळी भाषा विभागाचे सचिव भूषण गगराणी, सहसचिव मिलिंद गवादे, अवर सचिव अजय भोसले, उर्मिला धादवड आदी उपस्थित होते.
नाशिक येथील अखिल भारतीय मराठी साहित्य संमेलनामध्ये हा लघुपट दाखविण्यात आला होता. त्यानंतर हिवाळी अधिवेशन काळात सर्व लोकप्रतिनिधींसाठी विधानभवन परिसरात हा लघुपट दाखविण्यात आला. आजपासून मंत्रालय परिसरातील अधिकारी आणि अभ्यागतांना या लघुपट व प्रदर्शनाचा लाभ घेता येईल.