'संदीपान भूमरेंनी मंत्री झाल्यावर माझ्यासमोर लोटांगण घातलं.. CCTV फुटेज देतो - संजय राऊत

सर्व आमदार सध्या आपल्या नाराजीचे कारण संजय राऊत यांची विधान व त्यांची भाषा असल्याचं म्हणत आहेत. संजय राऊत यांच्या शिवराळ भाषेला कंटाळून बंडखोरी केल्याचं हे आमदार ( MLA ) म्हणत आहेत. खासदार संजय राऊतांची (MP Sanjay Raut ) संदीपान भुमरे ( Sandeepan Bhumare ) यांच्यावर जोरदार टीका केले आहेत.

मुंबई - मागील काही दिवस शिंदे गटाच्या बंडखोर आमदारांच्या निशाण्यावर खासदार संजय राऊत ( MP Sanjay Raut ) आहेत. हे सर्व आमदार सध्या आपल्या नाराजीचे कारण संजय राऊत यांची विधान व त्यांची भाषा असल्याचं म्हणत आहेत. संजय राऊत यांच्या शिवराळ भाषेला कंटाळून बंडखोरी केल्याचं हे आमदार ( MLA ) म्हणत आहेत. यावर आता स्वतः शिवसेनेचे नेते ( Shiv Sena leader ) व खासदार संजय राऊत यांनी प्रतिक्रिया दिली असून ते मुंबईत आपल्या निवासस्थानी ( Mumbai Residence ) माध्यमांशी बोलत होते.

गोंधळ करू नका, काय ते कारण ठरवा -यावर बोलताना राऊत म्हणाले की, "त्यांनी नेमकं ठरवावं त्यांनी नेमकी का बंडखोरी केली. जेव्हा ते सुरतला गेले. त्यावेळी त्यांनी राष्ट्रवादी निधी देत नसल्याचे कारण दिलं. मग ते सांगायला लागले, आम्ही हिंदुत्वासाठी या सरकारमधून बाहेर पडलो. नंतर सांगायला लागले आमच्याच पक्षाचे उद्धव ठाकरे यांच्या जवळचे लोक आमच्या विभागात देखील हस्तक्षेप आणि ढवळाढवळ करायला लागले. त्यामुळे आम्ही उठाव करत बाहेर पडलो. त्यांनी पक्ष का सोडला बंडखोरी का केली यासाठी त्यांनी स्वतः ची कार्यशाळा घेतली पाहिजे. आजही ते आमचे आहेत. पण, नक्की पक्ष का सोडला त्याचं कारण ठरवा गोंधळ करू नका."

तेव्हा यांचं हिंदुत्व कुठं होतं ? -"2014 साली जेव्हा युती तोडली तेव्हा यातला एकही लोक काही बोलली नाही. तेव्हा तुमचे हिंदुत्व कुठे होते. आता अडीच वर्षांनी तुमचं हिंदुत्व जागं झालं का ? संघटनेच्या कामातच मी आहे. पक्षाची भूमिका मांडतो. मुख्यमंत्र्यांच्या आसपास मला फार क्वचित पाहिला असाल. जिथे संघटनेचे काम असतं, तिथेच तुम्हाला हा संजय राऊत दिसेल. इथल्या एखादा सरकारी कार्यालयात तुम्हाला संजय राऊत ढवळाढवळ करताना दिसला तरी मला दाखवून द्या." असं थेट आव्हानच संजय राऊत यांनी बंडखोर गटाला केले आहे.

संदीपान भूमरेंनी लोटांगण घातलं -"संजय राठोड तिकडे जाण्याआधी आदल्या दिवसापर्यंत माझ्यासोबत बसले होते. त्यांच्यावर जेव्हा घाणेरडे आरोप झाले. त्यावेळी देखील अप्रत्यक्षपणे उद्धव ठाकरे भक्कमपणे त्यांच्या मागे उभे होते. आमचे संदिपान भुमरे तर, हे सरकार जेव्हा स्थापन झाले महाविकास आघाडीचे त्यावेळी सामना कार्यालयात येऊन त्यांनी प्रेमाने मला लोटांगण घातले होते. त्यावेळी त्यांनी म्हटलं होतं, साहेब तुम्ही होतात म्हणून हे सरकार स्थापन झालं आणि मी मंत्री झालो. पाहिजे तर त्याचे सीसीटीव्ही फुटेज मी तुम्हाला काढून देतो."

अर्धे तर पवारांसोबतचे आमच्याकडे आले -संजय राऊत नेहमी शरद पवारांची स्तुती करतात या बंडखोर अमदारांच्या आरोपांवर बोलताना राऊत म्हणाले की, "चालायचंच, ठीक आहे. जे बोलतायत त्यांना बोलू द्यात. पण, आमचं मन साफ आहे. कोणावरही काहीही आरोप करत सुटायचं आणि शरद पवार शिवसेनेला संपवत आहेत, असं म्हणायचं यात काही तथ्य नाही. या आरोप करणाऱ्यांमध्ये अर्धे लोक तर शरद पवारांच्याच पक्षातून आमच्याकडे आलेले आहेत. त्यामुळे यांच्या बोलण्याला किती महत्त्व द्यायचं आणि किती मनावर घ्यायचं हा ज्याचा त्याचा प्रश्न आहे." अशी प्रतिक्रिया संजय राऊत यांनी दिली आहे.

हेही वाचा -CM Eknath Shinde Takes Charge : मुख्यमंत्री एकनाथ शिंदेंनी मंत्रालयात पदभार स्वीकारला