Sachin Waze : स्फोटके प्रकरणात एनआयएने लावलेले यूएपीए कलम रद्द करा, सचिन वाझेची मुंबई उच्च न्यायालयात धाव

मुकेश अंबानी ( Mukesh Ambani ) यांच्या अँटेलिया या घराबाहेर स्फोटके ठेवल्याप्रकरणी राष्ट्रीय तपास यंत्रणेने ( National Investigation Agency ) लावलेले यूएपीए कलम रद्द करावे यासाठी माजी पोलीस अधिकारी सचिन वाझे ( Sachin Waze ) यांनी मुंबई उच्च न्यायालयात ( Mumbai High Court ) धाव घेतली आहे.

मुंबई -मुकेश अंबानी यांच्या अँटेलिया या घराबाहेर एका चारचाकीत स्फोटके ठेवल्याच्या प्रकरणात तब्बल १३ तासांच्या चौकशीनंतर माजी सहायक पोलीस निरीक्षक सचिन वाझे यांना राष्ट्रीय तपास यंत्रणेकडून ( National Investigation Agency ) अटक करण्यात आली होती. सचिन वाझे यांच्यावर अनेक कलमान्वये गुन्हे दाखल करण्यात आले आहे. त्यामधील यूएपीए ( Unlawful Activities Prevention Act ) हा कलम दहशतवादी कारवायाशी संबंधित असलेले कलम असून ते रद्द करण्यात यावे. यासाठी सचिन वाझे यांनी मुंबई उच्च न्यायालयात ( Mumbai High Court ) आज ( दि. २४ जानेवारी ) धाव घेतली आहे.

कोणत्या कलमाखाली गुन्हे..? -या आरोपपत्रामध्ये आरोपींविरुद्ध भा.दं.वि.चे कलम १२०(ब), २०१, २८६, ३०२, ३६४, ३८४, ३८६, ४०३, ४१९, ४६५ तसेच भा.दं.वि. ४७१, ४७३ आणि ५०६ कलमान्वये गुन्हे दाखल केलेले आहेत. याचबरोबर शस्त्रास्त्र कायद्याच्या कलम ३ आणि २५ नुसार व स्फोटक पदार्थ कायद्याच्या कलम ४, १६, १८ व २० UA(p)A अंतर्गत गुन्हे दाखल केलेले आहेत.

मनसुख हिरेनची हत्या प्रकरण - सचिन वाझे याने सुनील माने, विनायक शिंदे आणि अन्य आरोपींच्या मदतीने मनसुख हिरेनची हत्या केल्याचे एनआयएच्या ( National Investigation Agency ) तपासातून समोर आले. एनआयएने विविध अंगाने या प्रकरणाचा तपास केला. त्यात आरोपींच्या चौकशीतून ही माहिती समोर आली होती. २५ फेब्रुवारीला स्कॉर्पिओ गाडीत वाझेने जिलेटिनच्या कांड्या ठेवल्या होत्या. हेदेखील एनआयएच्या तपासातून समोर आले.

तब्बल २०० जणांचे नोंदवले जबाब - एनआयएने ( National Investigation Agency ) तब्बल २०० साक्षीदारांचे जबाब नोंदवले आहेत. २० साक्षीदार संरक्षित असून त्यांचे जबाब बंद लिफाफ्यातून न्यायालयात सादर करण्यात आलेले आहेत. या साक्षीदारांचे जबाब गुन्हेगारी प्रक्रियेच्या नियमानुसार न्यायाधीशांसमोर नोंदवण्यात आलेले आहेत.