मुंबई -मध्य रेल्वेच्या खडवली ते वाशिंद रेल्वे स्थानकादरम्यान दुपारी ३ वाजून ३० मिनिटांच्या सुमारास लोकलच्या ओव्हर हेड वायरमध्ये पेंटाग्राफ अडकल्याची घटना समोर आली. त्यामुळे मुंबईकडे येणारी लोकल सेवा विस्कळीत झाली असून एकामागे एक लोकल उभ्या होत्या. त्यामुळे मोठ्या प्रमाणात प्रवाशांचे हाल झाले.
काही लोकल फेर्‍या रद्द
मध्य रेल्वेने दिलेल्या माहितीनुसार, वाशिंदमधून सुटलेली लोकल खडवली स्थानकावर येत असताना ओव्हर हेड वायरमध्ये लोकलचा पेंटाग्राफ अडकला होता. त्यामुळे लोकलमधील विद्युत पुरवठा खंडित झालेला होता. घटनेची माहिती मिळताच मध्य रेल्वेचे अभियांत्रीकी पथक घटनास्थळी पोहोचले असून बिघाड दुरुस्तचे काम करत आहेत. मात्र, या घटनेमुळे मागून येणाऱ्या दोन मेल-एक्स्प्रेस गाड्या आणि एक लोकल अडकून पडली आहे. तसेच ३ वाजून २३ मिनिटांची ठाण्यावरून येणारी आसनगांव कल्याण स्थानकात रद्द करण्यात आली. मात्र, या घटनेमुळे लोकलचे बंचिग काढण्यासाठी काही लोकल फेर्‍या रद्द करण्यात आल्याची माहिती आहे.