आमचा न्यायव्यवस्थेवर पूर्ण विश्वास, सचिन वाझे यांच्या भावाची प्रतिक्रिया

मुंबईतील मनसुख हिरेन प्रकरणातील आरोपी सचिन वाझे यांना शनिवारी 'एनआयए'च्या विशेष न्यायालयात हजर करण्यात आले. कोर्टाने वाझे यांच्या कोठडीत सात एप्रिलपर्यंत वाढ केली आहे. यावेळी माध्यमांशी बोलताना सचिन वाझे यांचे बंधू सुधाराम वाझे म्हणाले की, आमचा एनआयए आणि कोर्टावर पूर्ण विश्वास आहे. आम्हाला योग्य न्याय मिळेल.

मुंबई -मुंबईतील मनसुख हिरेन प्रकरणातील आरोपी सचिन वाझे यांना शनिवारी 'एनआयए'च्या विशेष न्यायालयात हजर करण्यात आले. कोर्टाने वाझे यांच्या कोठडीत सात एप्रिलपर्यंत वाढ केली आहे. यावेळी माध्यमांशी बोलताना सचिन वाझे यांचे बंधू सुधाराम वाझे म्हणाले की, आमचा एनआयए आणि कोर्टावर पूर्ण विश्वास आहे. आम्हाला योग्य न्याय मिळेल.

सचिन वाझे यांचा आरोग्य अहवालदेखील सादर करण्याचे निर्देश एनआयए कोर्टाने तपास यंत्रणांना दिले आहेत. कोर्टाने म्हटले आहे की वाझे यांना आवश्यकतेनुसार वैद्यकीय मदत देण्यात यावी. त्यापूर्वी एनआयए कोर्टाने वाझे यांचा भाऊ सुधाराम यांचा अर्ज स्वीकारून त्यांना सचिन वाझे यांना भेटण्याची परवानगी दिली. सुधाराम यांनी वाझेंना भेटण्यासाठी पाच मिनिटाचा वेळ मागितला होता.

वाझेंच्या घरात आढळला अनोळखी व्यक्तीचा पासपोर्ट

निलंबित सहाय्यक पोलीस निरीक्षक सचिन वाझे हे, मनसुख हिरेन मृत्यू प्रकरणातील आरोपी आहेत. काही दिवसांपूर्वी मुकेश अंबानी यांच्या निवासस्थानाबाहेर स्फोटकांनी भरलेली कार आढळून आली होती. त्या कारचे मालक मनसुख हिरेन यांचा देखील संशयास्पद स्थितीत मृतदेह आढळू आला होता. याप्रकरणी सचिन वाझे यांना अटक करण्यात आली आहे. एनआयएने मुंबईतील मिठी नदीतून काही नंबर प्लेट्स व लॅपटॉप जप्त केला आहे. तसेच एका अनोळखी व्यक्तीचा पासपोर्ट वाझेंच्या घरी सापडला आहे. त्यामुळे त्यादृष्टीने तपास करण्याची आवश्यकता असल्याची माहिती एनआयएने विशेष कोर्टात दिली.