मुंबई -गेले पावणे दोन वर्षे कोरोना (Corona In Mumbai) विषाणूचा प्रसार आहे. या कालावधीत विषाणूच्या दोन लाटा आल्या व त्या थोपवण्यात पालिकेला यश आले आहे. पालिकेने केलेल्या उपाययोजना आणि नागरिकांनी दिलेली साथ यामुळे मुंबईमधील रुग्णसंख्या (Corona Patient In Mumbai) घटली होती. डिसेंबरमध्ये 2 डिसेंबर, 4 डिसेंबर आणि 5 डिसेंबरला 200 पेक्षा जास्त रुग्ण आढळून आले आहेत. त्यानंतर त्यात घट झाली होती. आता पुन्हा गेल्या दोन दिवसांत त्यात वाढ होऊन ही रुग्णसंख्या 200च्या पुढे गेली आहे.
रुग्णसंख्या पुन्हा 200 च्या पार -
मुंबईत गेल्या वर्षी मार्च महिन्यात कोरोना विषाणूचा पहिला रुग्ण आढळून आला. तेव्हापासून मुंबईत कोरोनाचा प्रसार आहे. फेब्रुवारी महिन्यात दुसरी लाट आली. एप्रिल महिन्यात रुग्णसंख्या 11 हजारावर गेली होती. जूनपासून त्यात घट होऊ लागली. 1 डिसेंबरला कोरोनाचे 108 नवे रुग्ण आढळून आले होते. 2 डिसेंबरला त्यात वाढ होऊन 228 रुग्ण आढळून आले. 3 डिसेंबरला त्यात घट होऊन 186 रुग्णांची नोंद झाली. 4 डिसेंबरला पुन्हा वाढ होऊन 228 तर 5 डिसेंबरला 219 रुग्ण आढळून आले. त्यानंतर रुग्णसंख्या कमी होऊन 6 डिसेंबरला 168 तर 7 डिसेंबरला 191 रुग्ण आढळून आले. काल 8 डिसेंबरला रुग्णसंख्या पुन्हा वाढून 250 तर आज 9 डिसेंबरला 218 नवे रुग्ण आढळून आले आहेत. यामुळे सलग दुसऱ्या दिवशी रुग्णसंख्या 200 च्या पार गेली आहे.