पडळकरांविरोधात राष्ट्रवादी विद्यार्थी काँग्रेस आक्रमक, भाजप कार्यालयासमोरच आंदोलन

गोपीचंड पडळकरांच्या निषेधार्थ आज (गुरुवार) राष्ट्रवादी विद्यार्थी काँग्रेसने मुंबईतील भाजप प्रदेश कार्यालयासमोर तीव्र आंदोलन करुन पडळकरांचा निषेध नोंदवला.

मुंबई - राष्ट्रवादी काँग्रेसचे अध्यक्ष शरद पवार यांच्याविरोधात भाजपचे आमदार गोपीचंद पडळकर यांनी केलेल्या बेताल वक्तव्याच्या विरोधात राज्यभर आंदोलने होत आहेत. आज (गुरुवार) राष्ट्रवादी विद्यार्थी काँग्रेसने मुंबईतील भाजप प्रदेश कार्यालयासमोर तीव्र आंदोलन करुन पडळकरांचा निषेध नोंदवला.

पडळकरांच्या विरोधात राष्ट्रवादी विद्यार्थी काँग्रेस आक्रमक, भाजप कार्यालयासमोरच आंदोलन

आमदार पडळकर आणि भाजपच्या विरोधात जोरदार घोषणाबाजी करत राष्ट्रवादी विद्यार्थी काँग्रेसच्या कार्यकर्त्यांनी भाजप कार्यालय दणाणून सोडले होते. राष्ट्रवादी विद्यार्थी काँग्रेसचे मुंबई अध्यक्ष अॅड. अमोल मातेले यांच्या नेतृत्वाखाली झालेल्या आंदोलनात मुंबई, ठाणेसह परिसरातील राष्ट्रवादी विद्यार्थी काँग्रेसचे पदाधिकारी, कार्यकर्ते सहभागी झाले होते. यावेळी भाजप आणि पडळकर यांच्या विरोधात जोरदार घोषणाबाजी करत पडळकर यांच्या प्रतिमेला चप्पल ने मारून संताप व्यक्त केला.

राष्ट्रवादी काँग्रेसचे अध्यक्ष शरद पवार यांच्याविरोधात पडळकर यांनी काल (बुधुवार) अत्यंत निषेधार्ह व्यक्तव्य केले होते. त्याचे राज्यभरात पडसाद उमटले असून, मुंबईतही आज भाजप कार्यालयासमोर राष्ट्रवादी विद्यार्थी काँग्रेसच्या पदाधिकाऱ्यांनी आंदोलन करून पडळकरांना इशारा दिला. दरम्यान, या आंदोलनानंतर राष्ट्रवादीच्या कार्यकर्त्यांना पोलिसांनी ताब्यात घेऊन सोडून देण्यात आले असल्याची माहिती देण्यात आली.