मुंबई -एनसीबीने आर्यन खान प्रकरणातील पंच प्रभाकर साईलला समन्स पाठवले आहे. साईल यांना 28 ऑक्टोबरला चौकशीसाठी हजर राहण्याचे आदेश देण्यात आले आहे. साईल यांनी आर्यन खान प्रकरणात 25 कोटी रुपयांची डील झाल्याचा आरोप केला होता.
हेही वाचा -दहिसर नाक्यातून 27 किलो चरस जप्त, मुंबई पोलिसांची कामगिरी
साईल यांनी केला होता हा आरोप
कॉर्डिलिया क्रूझवर झालेल्या ड्रग्स पार्टीमध्ये बॉलिवूड स्टार शाहरूख खान याचा मुलगा आर्यन खानसह आठ जणांना नार्कोटिक्स कंट्रोल ब्युरोने अटक केली होती. या प्रकरणी सर्व आरोपी गेले महिनाभर न्यायालयीन कोठडीत आहेत. या प्रकरणातील मुख्य पंच असलेल्या प्रभाकर साईल याने प्रतिज्ञापत्र सादर करत आर्यन खान प्रकरण दाबण्यासाठी 25 कोटींची डील झाली, त्यानंतर 18 कोटींवर डील फायनल झाल्याचा आरोप केला आहे. यावर प्रभाकर साईल याला पैसे मिळाले नाहीत म्हणून तो असे आरोप करत असल्याच्या चर्चा सुरू आहेत.
डीलशी आपला संबंध नाही
प्रभाकर साईल याने स्वाभिमानी रिपब्लिकन पक्षाचे अध्यक्ष मनोज संसारे यांच्या वडाळा येथील कार्यालयात एक पत्रकार परिषद घेऊन आपल्यावर लावण्यात आलेले सर्व आरोप फेटाळून लावले आहेत. गेल्या 40 वर्षांत आपल्यावर एकही गुन्हा दाखल नाही. मी कोणत्या राजकीय पक्षाशी संबंधित नाही. एनसीबीच्या कारवाई दरम्यान झालेल्या डीलशी आपला संबंध नाही. मी पगारावर घर चालवणारा व्यक्ती आहे. मला कोणी आमिष दाखवले नाही, असे स्पष्टीकरण साईल याने दिले होते.
सत्य समोर आणणार
माझ्या मुलीचा वाढदिवस होता. त्यासाठी मी किरण गोसावीकडे पैसे मागितले होते. त्याने मला दिले नाहीत. नंतर मला त्याच्या मित्राच्या अकाउंटवरून 5 हजार रुपये देण्यात आले. नंतर 10 हजार रुपये दिले. मला माझ्या पगाराशी देणेघेणे आहे, इतर कोण काय करतात त्याच्याशी काही देणेघेणे नाही. मी आर्यन खान प्रकरणानंतर सोलापूरला मित्राकडे होतो. त्यावेळी माझ्या राहत्या घरी पोलीस येत होते, असे पत्नीने सांगितले. त्यानंतर माझ्या मित्राने मला स्वाभिमानी रिपब्लिकन पक्षाच्या सोलापूर येथील नेत्यांशी भेट घालून दिली. त्यांनी मला मनोज संसारे यांना भेटवले. संसारे यांना यात तथ्य वाटल्याने त्यांनी हे प्रकरण उघडकीस आणावे, असे सांगितले. त्याप्रमाणे सत्य समोर आणत असल्याचे साईल याने सांगितले होते.
हेही वाचा -विधान परिषदेच्या 8 जागांसाठी डिसेंबर अखेर निवडणूक होण्याची शक्यता!
