मुंबई - देशातील दोन मोठे नेते पंतप्रधान नरेंद्र मोदी व काँग्रेस अध्यक्ष राहुल गांधी हे प्रचारासाठी आज महाराष्ट्रात येत आहेत. मोदी हे मुंबईत तर राहुल गांधी हे संगमनेर येथील सभेला संबोधित करतील.
मुंबईतील बांद्रा कुर्ला कॉम्प्लेक्समधील एमएमआरडीए मैदानात मोदी हे प्रचारासाठी येणार आहेत. तर काँग्रेस अध्यक्ष राहुल गांधी यांच्या विमानात बिघाड झाल्याने आज संगमनेर येथे होणारी सभा उशिरा होणार असल्याची शक्यता वर्तवली जात आहे. शिर्डी लोकसभा मतदारसंघाचे काँग्रेसचे उमेदवार भाऊसाहेब कांबळे यांच्या प्रचारार्थ ही सभा आयोजित केली आहे. संगमनेरमध्ये आज संध्याकाळी ६ वाजता होणारी सभा ६:३० वाजता सुरू होण्याचा शक्यता आहे. मात्र, गांधी यांच्या विमानाच्या इंजिनात आज सकाळी पाटणाकडे जाताना बिघाड झाला, त्यामुळे राहुल यांना तातडीने दिल्लीला परतावे लागले. राहुल यांनी याबाबत ट्विटद्वारे माहिती दिली.