मुंबई - शहरातील ३६ विधानसभा जागांवर अनेक आजी-माजी आमदार निवडणूक लढवत आहेत. तसेच अनेक नवखे उमेदवारही निवडणूकीच्या रिंगणात आहे. पण एक विशेष बाब म्हणजे यावेळी महापालिकेतील 11 विद्यमान नगरसेवक देखील आमदार बनण्यासाठी निवडणूकीच्या रिंगणात आहेत.
हेही वाचा... महाराष्ट्र विधानसभा : मुंबईत ३६६ उमेदवारांचे अर्ज वैध
विधानसभेसाठी विविध पक्षांकडून ९ नगरसेवकांना अधिकृत उमेदवारी दिली आहे तर दोन नगरसेवकांनी बंडाचा झेंडा उभारत उमेदवारी अर्ज दाखल केले आहेत. मात्र समाजवादी पक्षाचे गटनेते व नगरसेवक रईस शेख यांना भायखळा मतदारसंघ सोडून पक्षाच्या आदेशाने मुंबईबाहेर भिवंडीत निवडणूक लढवावी लागत आहे. त्याचप्रमाणे, भाजप, शिवसेना व काँग्रेसच्या ६ माजी नगरसेवकांनीही या निवडणुकीत आपले नशीब आजमवायचा निर्णय घेतला आहे. त्यामध्येही ४ माजी नगरसेवकांना पक्षाने अधिकृत उमेदवारी दिली आहे; तर २ माजी नगरसेवकांनी मात्र बंडखोरी करीत उमेदवारी अर्ज दाखल केले आहेत.
हेही वाचा... साताऱ्यातील आठ विधानसभा मतदारसंघातून 108 उमेदवारी अर्ज वैध
शिवसेना आणि भाजप यांना आपल्या बंडखोर आजी व माजी नगरसेवकांची समजूत काढत त्यांचे बंड काहीही उपाययोजना करून थंड करावे लागणार आहे. सुदैवाने वडाळा मतदारसंघात भाजपचे उमेदवार कालिदास कोळंबकर यांच्याविरोधात आक्रमक होत उमेदवारीसाठी आडून बसलेल्या शिवसेनेच्या माजी महापौर व विदमान ज्येष्ठ नगरसेविका श्रद्धा जाधव यांची पक्षश्रेष्ठींनी समजूत काढल्याने अर्ज न भरता माघार घेतली. त्यामुळे एक ठिकाणचे बंड मोडण्यात यश आले आहे.
महाराष्ट्र विधानसभा निवडणूक विधानसभेच्या रिंगणातील विद्यमान ११ नगरसेवक
शिवसेनेतर्फे रमेश कोरगावकर यांना भांडुप (प.) मतदारसंघात, दिलीप लांडे यांना चांदीवली मतदारसंघात तर महापौर विश्वनाथ महाडेश्वर यांना वांद्रे (पूर्व) मतदारसंघामधून उमेदवारी दिली आहे. तर काँग्रेसतर्फे आसिफ झकेरीया यांना वांद्रे (प.) मतदारसंघात, जगदिश अमीन कुट्टी यांना अंधेरी ( पूर्व) मतदारसंघात उमेदवारी देण्यात आली आहे. तसेच मनसेतर्फे संजय तुर्डे यांना कालिना मतदारसंघात उमेदवारी देण्यात आली आहे. समाजवादीचे गटनेते रईस शेख हे भायखळा मतदारसंघातून निवडणूक लढविण्यासाठी खूपच इच्छुक असताना व त्यासाठी त्यांनी पूर्वतयारीही केलेली असताना त्यांना ऐनवेळी पक्षाच्या वरिष्ठ नेत्यांनी गोवंडी येथील मतदारसंघात उमेदवारी देऊन त्यांची बोळवण केली आहे. त्याचप्रमाणे, अखिल भारतीय सेनेच्या गीता गवळी यांनीही भायखळा मतदारसंघातून उमेदवारी अर्ज दाखल केला आहे. भाजपतर्फे घाटकोपर (पूर्व) मधून विद्यमान आमदार प्रकाश मेहता यांचा पत्ता कट करून पराग शहा यांना उमेदवारी देण्यात आली आहे.
हेही वाचा... आरेमधील झाडे तोडणाऱ्या अधिकाऱ्यांना सत्तेत येताच पाकव्याप्त काश्मीरात पाठवू - आदित्य ठाकरे
माजी नगरसेवकांचीही लॉटरी
शिवसेनेने माजी नगरसेवक विठ्ठल लोकरे यांना मानखुर्द शिवाजीनगर मतदारसंघात, यामिनी जाधव यांना भायखळा मतदारसंघात उमेदवारी दिली आहे. तर, काँग्रेसनेही माजी नगरसेवक सुरेश कोपरकर यांना भांडुप (प.) मतदारसंघात, तर माजी नगरसेविका अजंता यादव यांना कांदिवली (पूर्व) मतदारसंघात उमेदवारी दिली आहे.
