मुंबई- राज्यभरात धावणाऱ्या ट्रक, डंपर, कंटेनर, बसेस मधून होणारी सामानाची व प्रवाशांची ओव्हरलोडिंग वाहनांविरोधात ( Overloading Vehicles ) थातुर-मातुर कारवाई न करता नियमाप्रमाणे गुन्हा नोंद करण्याची मागणी महाराष्ट्र नवनिर्माण वाहतूक सेनेने परिवहन आयुक्त कार्यालयाकडे केली आहे. तसेच या मागणीवर पोलीस अधीक्षक, मुख्य सचिव आणि परिवहन आयुक्त यांची संयुक्त बैठक आयोजित करून आपले म्हणणे मांडण्याची संधी देण्याचे आवाहन मनसेने परिवहन आयुक्तांना दिलेल्या निवेदनात केली आहे.
दंडात्मक थातुरमातुर कारवाई नको
मनसे नेते संजय नाईक यांनी सांगितले की, वाहनाच्या क्षमतेहून अधिक भार वाहून नेणाऱ्यांवर थातुरमातुर दंडात्मक कारवाई केली जात आहे. त्यामुळे या कारवाईला न जुमानता माल वाहतूक वाहने सर्रासपणे क्षमतेहून अधिक मालाची वाहतूक करत आहेत. परिणामी, रस्त्यावर जाणाऱ्या वाहन चालकांसह पादचाऱ्यांचाही जीव धोक्यात घातला जात आहे. याशिवाय ओव्हरलोड वाहनांमुळे रस्त्यांचीही हानी होत आहे. मनसे कार्यकर्त्यांनी 21 डिसेंबरला अधिक भार वाहतूक ( Overloading Vehicles ) करणाऱ्या वाहनास पकडून देत कारवाई करण्यास भाग पाडल्याने संबंधित वाहन मालक आणि त्याच्या साथीदारांनी मनसे कार्यकर्त्यांवर हल्ले केले होते. तसा शिवडी पोलिसांत गुन्हा नोंदवण्यात आला आहे. मात्र, या प्रकरणाची गंभीर दखल घेत प्रशासनाने दंडात्मक कारवाई पुरते मर्यादीत न राहता ओव्हरलोडींग वाहनांवर नियमाप्रमाणे गुन्हा नोंदवण्याची कार्यवाही सुरु करावी, अशी मागणी मनसेच्या वाहतूक शाखेने केल्याचे नाईक यांनी स्पष्ट केले.