मुंबई -उपनगरीय रेल्वे मार्गावर रेल्वे रुळांची दुरुस्ती आणि तांत्रिक कामांसाठी मध्य रेल्वे मार्गावर रविवारी ७ नोव्हेंबर २०२१ रोजी मेगाब्लॉक घेण्यात येणार आहे. मध्य रेल्वेच्या हार्बर मार्गावरील चुनाभट्टी/वांद्रे- छत्रपती शिवाजी महाराज टर्मिनस अप आणि डाऊन हार्बर मार्गावर मेगाब्लॉक असणार आहे. तर ट्रान्सहार्बर मार्गावरील ठाणे ते वाशी/नेरुळ अप आणि डाउन मार्गावर मेगाब्लॉक असणार आहे. पश्चिम रेल्वे मार्गावर रविवारी कोणताही मेगाब्लॉक नसणार आहे.
हार्बर मार्गावर मेगाब्लॉक-
मध्य रेल्वेच्या हार्बर मार्गावरील छत्रपती शिवाजी महाराज टर्मिनस - चुनाभट्टी/वांद्रे स्थानकादरम्यान अप आणि डाऊन हार्बर मार्गावर मेगाब्लॉक असणार आहे. हा मेगाब्लॉक रविवारी सकाळी ११.४० ते सायंकाळी ४.४० पर्यंत असणार आहे. या मेगालॉक दरम्यान छत्रपती शिवाजी महाराज टर्मिनस मुंबई/वडाळा रोड येथून सकाळी ११.३४ ते सायंकाळी ४.४७ वाजेपर्यंत वाशी/बेलापूर/पनवेल करीता सुटणाऱ्या आणि छत्रपती शिवाजी महाराज टर्मिनस मुंबई येथून सकाळी ९.५६ ते सायंकाळी ४.४३ पर्यंत वांद्रे/गोरेगाव करीता सुटणाऱ्या डाउन हार्बर मार्गावरील सेवा बंद राहतील. पनवेल/बेलापूर/वाशी येथून सकाळी ९.५३ ते दुपारी ३.२० पर्यंत छत्रपती शिवाजी महाराज टर्मिनस मुंबई करीता सुटणाऱ्या अप हार्बर मार्गावरील सेवा आणि गोरेगाव/वांद्रे येथून सकाळी १०.४५ ते सायंकाळी ४.५८ पर्यंत छत्रपती शिवाजी महाराज टर्मिनस मुंबईसाठी अप हार्बर मार्गावरील सेवा बंद राहतील.