16:51 November 23
बीडमधील शाळा सुरू; मात्र तीनच विद्यार्थी हजर
बीड - बीड शहरातील चंपावती इंग्लिश स्कूलमध्ये नववी व दहावीचा वर्ग मिळून 175 विद्यार्थी आहेत. यापैकी केवळ तीनच विद्यार्थ्यांच्या पालकांनी शाळेत मुलं पाठविण्याबाबत संमतीपत्र दिले आहे. तीन मुलांवर शाळा सुरू करायची कशी? असा प्रश्न चंपावती इंग्लिश स्कूलचे प्राचार्य ए. आर. गंधे यांनी उपस्थित केला आहे. दुसरी महत्त्वाची बाब म्हणजे, अनेक शिक्षकांच्या कोरोना चाचणीचा अहवाल अद्याप शाळेला मिळालेला नाही. त्यामुळे जिल्हा प्रशासन आणि शाळांमध्ये समन्वय नसल्याचे समोर आले आहे.
16:38 November 23
जिल्ह्यातील अनेक शाळेत आज घंटा वाजलीच नाही, शिक्षकांची कोविड तपासणी अजून अपूर्णच
रायगड - आज शाळांची घंटा वाजण्याचा मुहूर्त जिल्ह्यातील अनेक ठिकाणी टळला, तर काही ठिकाणी कोरोना नियम पाळून शाळा सुरू झाल्या आहेत. कोकण एज्युकेशन सोसायटीच्या नववी ते बारावीपर्यंतच्या शाळेचे वर्ग भरले न गेल्याने आठ महिन्यानंतर वाजणारी घंटा वाजली नाही. तर अलिबागमधील दत्ताजी खानविलकर शाळेसह जिल्ह्यातील काही शाळा आज सुरक्षित अंतर पाळून सुरू झाल्या आहेत.
15:19 November 23
धास्तीची पाठशाळा; गडचिरोलीत अनेक ठिकाणी विद्यार्थ्यांविनाच वाजली शाळेची घंटा
गडचिरोली -कोरोना महामारीमुळे गेल्या आठ महिन्यांपासून बंद असलेल्या शाळांची पहिली घंटा आज (23 नोव्हेंबर) वाजली. आठ महिन्यानंतर शाळा सुरु होणार म्हटल्यावर विद्यार्थ्यांमध्ये उत्साह होता. परंतु, कोरोना महामारीचे संकट अद्यापही दूर न झाल्याने 'मस्ती'ची पाठशाळा आता 'धास्ती'ची पाठशाळा झाली आहे. त्यामुळेच गडचिरोली शहरातील अनेक शाळांमध्ये विद्यार्थ्यांविनाच शाळेची घंटा वाजल्याचे चित्र दिसून आले.
23 नोव्हेंबर म्हणजे आज सोमवारपासून नववी ते बारावीपर्यंतचे वर्ग सुरू करण्यास शासनाने परवानगी दिली. तत्पूर्वी या वर्गाला शिकवणाऱ्या शिक्षकांना कोरोना तपासणी करणे बंधनकारक करण्यात आले होते. त्यानुसार गडचिरोली जिल्ह्यातील 2 हजार 756 शिक्षकांची कोरोना चाचणी करण्यात आली. यामध्ये अनेक शिक्षक कोरोना पॉझिटिव्ह आढळून आले.
कोरोनाचा संसर्ग विद्यार्थ्यांना होऊ नये यासाठी आवश्यक त्या सर्व उपाययोजना करण्याचे निर्देश शासनाने दिले होते. त्यानुसार प्रत्येक शाळांनी वर्गखोल्यांची स्वच्छता केली. सॅनिटायझर, ऑक्सीमीटर, थर्मामीटर असे साहित्य शाळेमध्ये उपलब्ध करून देत विद्यार्थ्यांची तपासणी करणार होते. मात्र, कोरोना संसर्गाच्या भीतीमुळे पहिल्याच दिवशी अनेक शाळांमध्ये बोटावर मोजण्याइतक्या विद्यार्थ्यांची उपस्थिती होती.
12:13 November 23
संमतीपत्र न आल्यामुळे विद्यार्थ्यांना पाठविले परत; मनपा शाळा क्र. 26 मधील प्रकार..
अकोला -राज्य सरकारने त्या त्या जिल्ह्यातील जिल्हाधिकारी यांच्या भरवशावर शाळा सुरू करण्याचा निर्णय घेतल्यामुळे आधीच गोंधळाची स्थिती आहे. त्यात शाळा समितीलाही काय करावे, हा प्रश्न असताना शिवसेना वसाहतीमधील मनपाच्या शाळा क्र. 26 मध्ये विद्यार्थ्यांनी पालकांचे संमतीपत्र न आल्यामुळे विद्यार्थ्यांना शिक्षकांनी परत पाठविले आहे. विद्यार्थ्यांची जबाबदारी कोण घेईल, असा प्रश्न यामुळे उपस्थित झाला आहे. तर दुसरीकडे शिक्षकांची कोरोना तपासणी झाली, विद्यार्थ्यांची का नाही, असा प्रश्नही शिक्षकांनी उपस्थित केला आहे..
11:54 November 23
शिक्षक आले मात्र विद्यार्थीच शाळेत आले नाहीत; शिक्षकांच्या कोरोना टेस्टही लांबणीवर..
बीड - राज्य शासनाच्या निर्देशानुसार सोमवारपासून शाळा सुरू करण्याचे आदेश देण्यात आलेले आहेत. मात्र, बीड जिल्ह्यात शाळा सुरू करण्यासंदर्भात शिक्षक व प्रशासन यांच्यात संभ्रम असल्याचे चित्र सोमवारी पाहायला मिळाले. बीड शहरातील शिवाजी विद्यालयात सकाळी नऊ वाजता शाळेच्या वेळेनुसार सर्व शिक्षक हजर झाले. मात्र पालकांनी आपल्या विद्यार्थ्यांना शाळेत पाठवले नाही. तर दुसरीकडे शिक्षकांच्या कोरोना टेस्ट देखील बाकी असल्याने शाळा सुरू करण्यासंदर्भात गोंधळ निर्माण झाला होता.
11:39 November 23
सिंधुदुर्गात शाळा सुरू, विद्यार्थ्यांचा पहिल्या दिवशी चांगला प्रतिसाद..
सिंधुदुर्ग - जिल्ह्यात आजपासून अखेर शाळा सुरू झाल्या. पहिल्या दिवशी विद्यार्थ्यांचा चांगला प्रतिसाद मिळाला आहे. काही शाळांमधील शिक्षकांच्या कोरोना चाचण्या झालेल्या नाहीत, त्यामुळे जिल्ह्यातील 30 टक्के शाळा सुरू होऊ शकल्या नाहीत. जिल्ह्यातील कासार्डे माध्यमिक विद्यालय व कनिष्ठ महाविद्यालय सुरू झाले. कणकवली देवगड, वैभववाडी या तीन तालुक्यातून विद्यार्थी येथे येतात. इयत्ता नववी ते बारावीपर्यंत येथे 861 विद्यार्थी शिक्षण घेतात. त्यांपैकी आज 65 टक्के विद्यार्थी उपस्थित होते.
11:11 November 23
रत्नागिरीत शाळा झाल्या सुरू, मात्र मुलांना शाळेत पाठवण्यास अनेक पालकांची असहमती..
रत्नागिरीमध्ये शाळा सुरू झाल्या असल्या, तरी अनेक पालक आपल्या मुलांना शाळेत पाठवण्यास तयार नाहीत.
11:05 November 23
जालन्यात शिक्षकांची तयारी पूर्ण, मात्र विद्यार्थी गायब..
कोरोना महामारी सुरू झाल्यानंतर तब्बल नऊ महिन्यांनी आज पहिल्यांदा शाळाची शाळेची घंटा वाजली. मात्र, पहिल्या घंटेचा विद्यार्थ्यांमध्ये असलेला उत्साह आज दिसला नाही. दरम्यान शाळेने विद्यार्थी शाळेत यावेत यासाठी सर्व खबरदारी घेत नियोजन केले आहे. आज शाळा सुरू होणार त्यासाठी प्रशासनाने शाळांना दिलेल्या सूचनेनुसार त्यांचे पालन करत शाळेची निर्जंतुकीकरण करून घेतले आहे. तसेच शाळेमध्ये येणाऱ्या शिक्षकांची covid-19 ही तपासणी करून घेतली आहे. दरम्यान आज पहिल्याच दिवशी शाळेमध्ये आलेल्या विद्यार्थ्यांचे तापमान तपासून आणि निर्जंतुकीकरण करून त्यांना प्रवेश देण्यात आला.
11:04 November 23
आठ महिन्यानंतर लातूर जिल्ह्यातील शाळा सुरू; विद्यार्थ्यांची लक्षणीय उपस्थिती
लातूर - सकाळच्या प्रहरी विद्यार्थ्यांची रेलचेल सुरू झाली आहे. कुणी सायकलवरून तर कोणी पायी शाळेकडे मार्गस्थ होत असलेले चित्र आठ महिन्यानंतर पाहवयास मिळत आहे. ऑनलाइन शिक्षणाचे धडे दिले जात होते. मात्र, शाळेची ओढ ही काही न्यारीच असल्याचा सूर विद्यार्थ्यांमधून होता. आज तब्बल आठ महिन्यानंतर शाळा सुरू झाल्या असून पहिल्या दिवशी इयत्ता 9 वीच्या विद्यार्थ्यांना प्रवेश देण्यात आला होता. लातूर जिल्ह्यातील 647 पैकी 542 शाळा आजपासून सुरू झाल्या आहेत.
10:26 November 23
आश्रमशाळांसाठी १ डिसेंबरचा मुहूर्त..
आजपासून राज्यातील शाळा सुरू होत असल्या, तरी आश्रमशाळा सुरू करण्याबाबत वरिष्ठ स्तरावरून अद्याप काही हालचाली झाल्या नाहीत. निवासी आश्रमशाळा व वसतिगृहातील विद्यार्थी त्यांच्या पालकांसह घरापासून दूर राहतात. त्यामुळे त्यांचा सुरक्षित सांभाळ करण्याची जबाबदारी आदिवासी विकास विभागाचीच असते. पुणे येथील समाजकल्याण विभागाकडून पुणे जिल्ह्यातील इयत्ता नववी ते बारावी पर्यंतच्या आश्रमशाळा १ डिसेंबर पासून सुरु करण्यास परवानगी दिली आहे. त्यानुसार आश्रमशाळा विद्यार्थ्यांच्या सुरक्षिततेच्या दृष्टीने विविध उपाययोजना करत आहेत..
10:09 November 23
पुण्यातील शाळा सुरू होण्यासाठी सज्ज..
पुणे जिल्ह्याच्या ग्रामीण भागातील शाळा आजपासून पुन्हा सुरुवात होत आहे. या पार्श्वभूमीवर शाळा प्रशासन सज्ज झाले असून, आम्हाला शाळांमध्ये सुरक्षित वाटत असल्याचे मत काही विद्यार्थी व्यक्त करत आहेत.
10:04 November 23
लातुरातील ५४२ शाळांची घंटा वाजणार; नियम-अटींचे पालन करून शाळा सज्ज
लातूर - जिल्ह्यातील माध्यमिक शाळा सुरू करण्याच्या अनुषंगाने प्रशासनाकडून सर्वतोपरी तयारी करण्यात आली आहे. जिल्ह्यात ६४७ शाळा असल्या तरी सोमवारी ५४२ शाळा सुरू होणार आहेत. त्यानुसार प्रशासनाने घालून दिलेल्या नियम अटींचे पालन केले जात आहे. शिक्षणाधिकारी औदुंबर उकिरडे यांनी जिल्ह्यातील माध्यमिक शाळांचा आढावा घेतला आहे. याकरिता पालकांचे संमती पत्रही घेण्यात आले आहे.
10:04 November 23
राज्यात ५०० पेक्षा जास्त शिक्षक कोरोनाबाधित..
शाळा उघडण्याच्या पार्श्वभूमीवर शिक्षकांना कोरोना चाचणी करणे बंधनकारक करण्यात आले आहे. या चाचण्यांमध्ये राज्यात तब्बल पाचशेहून अधिक शिक्षक कोरोनाग्रस्त असल्याचे पुढे आले आहे. मुंबईसह राज्यातील ५० हजाराहून अधिक शिक्षक आणि शिक्षकेतर कर्मचारी यांच्या कोरोना चाचणीचे अहवाल अजूनही प्रलंबित असल्याने शाळा उघडण्याबाबत प्रश्नचिन्ह आहेत.
10:04 November 23
या जिल्ह्यांमध्ये बंद असणार शाळा..
मुंबई, नागपूर, ठाणे, औरंगाबाद शहर, जळगाव, नाशिक, पुणे याठिकाणी शाळा उघडणार नाहीत. दिवाळीनंतर या जिल्ह्यांमध्ये कोरोनाचा संसर्ग वाढू लागल्याने सुरक्षेच्या दृष्टीकोनातून जिल्हा प्रशासनाने हा निर्णय घेतला आहे. या जिल्ह्यांमध्ये डिसेंबर आणि जानेवारीत शाळा सुरू होतील. मात्र, अंतिम निर्णय हा त्यावेळी कोरोनाच्या परिस्थितीचा आढावा घेऊन घेतला जाईल.
10:03 November 23
या जिल्ह्यांमध्ये उघडणार शाळा..
लातूर, नंदुरबार, रायगड, गडचिरोली, वर्धा, अमरावती, औरंगाबाद ग्रामीण भागातील शाळा आजपासून उघडणार आहे. शाळा प्रशासनाने याबाबतची तयारी पूर्ण केली आहे.
09:57 November 23
राज्यातील शाळा पुन्हा उघडल्या..
कोरोनाच्या पार्श्वभूमीवर बंद करण्यात आलेल्या राज्यातील शाळा आजपासून सुरू होत आहेत. नववी ते बारावीपर्यंतचे वर्ग आजपासून सुरू करण्याचा निर्णय राज्य सरकारने घेतला होता. त्यानुसार राज्यातील बऱ्याच जिल्ह्यांमध्ये शाळा सुरू होत आहेत. काही जिल्ह्यांमध्ये मात्र कोरोना रुग्णांची संख्या अधिक असल्यामुळे शाळा बंदच ठेवण्याच्या निर्णय जिल्हा प्रशासनाने घेतला आहे.