मुंबई -मुंबईची लाईफलाईन असलेल्या बेस्टकडून खासगी ( Mumbai Best Bus ) बसेस चालवल्या जात आहेत. या खासगी बसवर आता महिला चालकांची ( Women Driver On Best Bus ) नियुक्ती करण्यात आली आहे. येत्या आठवडाभरात या महिला चालक मुंबईत बस चालवताना दिसणार आहेत. यात रिक्षा चालक ते बस चालक असा प्रवास करणाऱ्या लक्ष्मी जाधव ( Lakshmi Jadhav First Women Best Driver ) यासुद्धा एक चालक आहेत.
बेस्टमध्ये महिला चालक -१९२६ पासून बेस्ट उपक्रमाकडून मुंबईकरांना परिवहन सेवा दिली जात आहे. बेस्ट उपक्रम गेल्या काही वर्षांत आर्थिक संकटात आला आहे. यामुळे खासगी कंत्राटदाराकडून बसेस चालवल्या जात आहेत. या खासगी बसेस वर आता महिला चालकांची नियुक्ती केली जाणार आहे. सुरुवातीला तीन महिला चालकांची निवड करण्यात आली आहे. त्यांना सध्या ट्रेनिंग देण्याचे काम सूरु असून येत्या आठवडाभरात मुख्यमंत्री उद्धव ठाकरे यांच्या उपस्थितीत या महिला चालकांना अधिकृत रित्या बस चालवण्यासाठी नियुक्ती केली जाणार आहे.
रिक्षा चालक ते बस चालक -बेस्टकडून निवड करण्यात आलेल्या तीन महिलांपैकी एक महिला मुलुंड येथील रहिवासी आहे. त्या महिलेचे नाव लक्ष्मी जाधव असे असून २०१६ पासून त्या रिक्षा चालक आहेत. रिक्षा परमिट मिळवणाऱ्या त्या पहिल्या महिला चालक आहेत. लक्ष्मी जाधव यांनी बिडब्लू आणि मर्सिडीझ सारखी चार चाकी वाहने चालवली आहेत. दरमहा उत्पन्न मिळाले पाहिजे भविष्यातही नोकरीचा उपयोग झाला पाहिजे, यासाठी त्यांनी म्हणून बेस्टच्या चालकाची नोकरी करण्याचा निर्णय घेतला. बेस्टच्या दिंडोशी आगारात त्यांनी आपली चालक म्हणून नोंदणी केल्यावर 2019 मध्ये त्यांना बस चालवण्याची मान्यता मिळाली होती. लक्ष्मी जाधव यांच्यासोबत पती, दोन मुलगे आहेत. एक अभियांत्रिकी आणि दुसरा कॉमर्सचे शिक्षण घेत आहेत.