पक्षाचे अस्तित्व संपत असताना शरद पवार यांनी 'ईडी'ला दोष देऊ नये - किरीट सोमय्या

राष्ट्रवादी काँग्रेसचे अध्यक्ष शरद पवार यांच्यासह पक्षाच्या बड्या नेत्यांवर प्रवर्तन निर्देशनालयाने (ईडीने) राज्य सहकारी बँकेच्या अनियमित कर्जवाटप प्रकरणात गुन्हा दाखल केला आहे. याप्रकरणी किरीट सोमय्या यांनी पवारांवर टीका केली आहे.

मुंबई - राष्ट्रवादी काँग्रेसचे अध्यक्ष शरद पवार यांच्यासह पक्षाच्या बड्या नेत्यांवर प्रवर्तन निर्देशनालयाने (ईडीने) राज्य सहकारी बँकेच्या अनियमित कर्जवाटप प्रकरणात गुन्हा दाखल केला आहे. या प्रकरणी भाजपचे माजी खासदार किरीट सोमय्या यांनी, ईडीने अजित पवार यांच्यावर गुन्हा दाखल करायला उशीर केल्याचे म्हटले आहे. तसेच शरद पवार यांनी हा दोष ईडीला देऊ नये, याप्रकरणी सर्वांची चौकशी होणार असल्याचे सोमय्यांनी सांगितले.

अजित पवार यांच्यावर अगोदरच सिंचन घोटाळ्याप्रकरणी गुन्हा दाखल आहे. हे प्रकरण सध्या न्यायालयात असून, आज ना उद्या कारवाई होणारच, असे सोमय्या म्हणाले.

राष्ट्रवादी काँग्रेसच्या नेत्यांनी राज्य सहकारी बँकेचे पैसे लंपास करून आपल्याच नातेवाईक, कार्यकर्त्यांना वाटले आहेत. बोगस सहकारी साखर कारखाने, संस्था स्थापन करून शेतकऱ्यांच्या नावाने शेकडो कोटी रुपये लंपास केल्याचा आरोप सोमय्यांनी केला.

या घोटाळ्या प्रकरणी न्यायालयाने गुन्हा दाखल करण्याचे आदेश दिले आहेत. त्यामुळे ईडीमार्फत चौकशी होत असल्याने यामध्ये शंका घेण्यासारखे काहीही नाही, असे किरीट सोमय्या म्हणाले. यावेळी त्यांनी घोटाळे केलेल्यांवर कारवाई होणार असल्याचा विश्वास व्यक्त केला.

ईडीच्या कारवाईबाबत किरीट सोमय्या पुढे म्हणाले की,'शरद पवार म्हणतात ही राजकीय कारवाई आहे'; तर मला वाटतं, शरद पवार यांच्या पक्षाचे आता अस्तित्वात संपत असताना ते ईडीला दोष देत आहेत.

तसेच या कारवाईचे सर्व श्रेय महाराष्ट्रतील जनतेचे असल्याचे सोमय्या यांनी सांगितले.