मुंबई -माजी मुंबई पोलीस आयुक्त परमबीर सिंग यांनी थेट गृहमंत्री अनिल देशमुख यांच्यावर गंभीर आरोप करत, थेट मुख्यमंत्री उद्धव ठाकरे यांना पत्र लिहिले. गृहमंत्री देशमुख निलंबित एपीआय सचिन वाझे यांचा वसूलीसाठी वापर करत होते, असा गंभीर आरोप सिंग यांनी पत्रातून केला. गृहमंत्री देशमुख यामुळे गोत्यात आल्याने गाशा गुंडाळणार असून त्या जागी प्रदेशाध्यक्ष जयंत पाटील यांची वर्णी लागण्याची शक्यता आहे.
वसुलीच्या आरोपामुळे देशमुख गोत्यात-
अँटिलिया समोर आढळलेली स्फोटके, मनसुख हिरेन या व्यावसायिकाचा संशयास्पद मृत्यू आणि त्यानंतर सहाय्यक पोलीस अधिकारी सचिन वाझे यांना झालेल्या अटकेवरून विरोधकांनी राज्य सरकारला घेरले. पोलीस दलात वरिष्ठ पातळीवर बदल्या करून सरकारने विरोधकांच्या टीकेची धार कमी करण्याचा प्रयत्न केला.
मात्र, माजी मुंबई पोलीस आयुक्त परमबीर सिंग यांनी गृहमंत्री अनिल देशमुख हे सचिन वाझे यांचा वसुलीसाठी वापर करत होते. त्यांना प्रत्येक महिन्याला शंभर कोटींचे टार्गेट दिल्याचा खळबळजनक आरोप सिंग यांनी राज्यपाल, मुख्यमंत्री यांना पत्र लिहून केला. गृहमंत्र्यांनी हे आरोप फेटाळून लावले. मात्र, विरोधकांनी आक्रमक पवित्रा घेत, गृहमंत्र्यांच्या राजीनाम्याची मागणी जोर लावून धरली.