मुंबई- शहरात बोरिवली परिसरातील उच्चभ्रू सोसायटीमधील रहिवाशांसाठी त्या परिसरात गार्डनची सोय करण्यात आली आहे. मात्र, येथील रहिवाशी एका वेगळ्याच कारणाने त्रस्त झाले होते. या गार्डनमध्ये येऊन अश्लील चाळे करणाऱ्या जोडप्यांचे प्रमाण मोठ्याप्रमाणात वाढले होते. त्यामुळे यावर उपाय म्हणून बोरवली पश्चिम येथील जॉगर्स पार्कजवळ सोसायटीने थेट रस्त्यावर 'नो किसिंग झोन' अशा आशयाच्या सूचना रंगवल्या आहेत. त्यामुळे या सूचना आता बोरिवलीमध्ये चर्चेचा विषय ठरल्या आहेत.
नो किसिंग झोन'च्या सूचना
मुंबईतील बोरिवली हा परिसर हाय प्रोफाईल विभाग म्हणून गणला जातो. या ठिकाणच्या प्रत्येक रहिवाशी सोसायटीमध्ये एक मोठे गार्डन बनवले आहे. सोसायटीतील नागरिक या ठिकाणी व्यायाम करण्यासाठी तर लहानमुले खेळण्यासाठी येत असतात. मात्र, अलिकडच्या काळात या ठिकाणी प्रेमी युगुलांचा वावर मोठ्याप्रमाणात वाढला आहे. काही जोडपे येऊन बागेत बसलेली असतात तर काही जण अश्लील चाळे करत असल्याचे प्रमाण वाढले आहे. त्यामुळे परिसरातील आजूबाजूचे रहिवासी त्रस्त झाले आहेत. लहान मुले, महिलावर्ग आणि ज्येष्ठ नागरिकांना याचा त्रास सहन करावा लागत आहे.