मुंबई -दरवर्षी पावसाचे पाणी साचून मुंबईची तुंबई होते. मुंबईची तुंबई होऊ नये, म्हणून पालिका नालेसफाई करते. नालेसफाईत दरवर्षी ( Nalasfai Mumbai ) घोटाळा झाल्याचा आरोप केला जातो. यंदा भाजपाकडून गेले आठवडाभर नालेसफाईच्या ( BJP Mumbai Nalasfai Review ) कामाचा आढावा घेऊन पोलखोल केली जात आहे. त्यावर भाजपाला नालेसफाई पाहण्याची घाई झाली, असा टोला मुंबईच्या माजी महापौर किशोरी पेडणेकर ( Mumbai Former Mayor Kishori Pednekar ) यांनी लगावला आहे. शिवसेनेच्या माजी नगरसेवकांची बैठक ( Meeting of former corporators Shiv Sena ) आज (बुधवारी) मुंबईत आयोजित करण्यात आली होती. त्यानंतर पेडणेकरांनी माध्यमांशी संवाद साधला.
शिवसेना नगरसेवकांची बैठक : मुंबईमध्ये पावसाळ्याच्या पार्श्वभूमीवर नालेसफाईची कामे सुरु झाली आहेत. या कामांची पाहणी भाजपाकडून केली जात आहे. नाल्यात गाळ असताना सत्ताधारी फरार असा आरोप भाजपाकडून वेळोवेळी करण्यात आला आहे. गेले आठवडाभर केलेल्या नालेसफाईच्या कामांचा अहवाल भाजपाकडून पालिका आयुक्तांना सादर करण्यात आला आहे. त्याचवेळी शिवसेनेच्या माजी नगरसेवकांची एक बैठक मुंबई महापालिका मुख्यालयात आयोजित करण्यात आली. या बैठकीत नालेसफाई, प्रशासकीय कार्यकाळातील विभागामधील कामे, पालिका निवडणूक तयारी आदी विषयांवर चर्चा करण्यात आली. या बैठकीबाबत सांगताना आज बऱ्याच दिवसांनी शिवसेनेचे नगरसेवक एकत्र आले आहेत. आम्ही सध्या नगरसेवक नसलो तरी आमची जबाबदारी संपलेली नाही. आमची नाळ मुंबईकरांसोबत जोडली आहे. रस्त्यांची कामे सुरु आहेत, नाल्यांमधील गाळ काढला जात आहे. त्या कामाची पाहणी करण्याबाबत आजच्या बैठकीत चर्चा झाली, असे माजी महापौर किशोरी पेडणेकर यांनी सांगितले. माजी स्थायी समिती अध्यक्ष यशवंत जाधव यांच्यावर इन्कम टॅक्स धाड पडल्याने ते अनुपस्थित आहेत का असा प्रश्न विचारल्यावर जाधव त्यांच्या वैयक्तिक कामामुळे आले नाहीत, असे स्पष्टीकरण पेडणेकर यांनी केले.