अंधेरीतील पेनिन्सुला व्यावसायिक इमारतीला आग, ४० ते ४५ जण सुखरूप बाहेर

अंधेरी येथील पेनिन्सुला इमारतीला आग लागल्याची घटना घडली आहे. घटनास्थळी अग्निशमनच्या 4 गाड्या दाखल झाल्या असून आगीवर नियंत्रण मिळवण्याचे प्रयत्न सुरू आहेत.

मुंबई -अंधेरीमधील वीरा देसाई मार्गावरील पेनिन्सुला व्यावसायिक इमारतीला आग लागल्याची घटना घडली आहे. यामधून आतापर्यंत ४० ते ४५ जणांना सुखरूप बाहेर काढण्यात आले आहे. तसेच आग नियंत्रणात आणण्याचे प्रयत्न सुरू आहेत.

पेनिन्सुला इमारत तब्बल २२ मजल्यांची आहे. यामध्ये प्रोडक्शन हाऊससह व्यावसायिक कार्यालये आहेत. आज सोमवारी दुपारी १२.४८ वाजण्याच्या सुमारास ६ व्या मजल्यावर शार्ट सर्कीट झाल्यामुळे आग लागली. त्यानंतर ही आग १२ व्या मजल्यापर्यंत पसरली. त्यानंतर अग्निशमन दलाला पाचारण करण्यात आले. सध्या आग विझवण्याचे काम सुरू आहे.