मुख्यमंत्री उद्धव ठाकरेंना दिलासा! विधान परिषदेची निवडणूक २१ मे ला होणार, आयोगाची सशर्त परवानगी

भारतीय निवडणूक आयोगाने महाराष्ट्रात विधान परिषदेच्या ९ रिक्त जागांसाठी निवडणूक घेण्यास परवानगी दिली आहे. त्यामुळे मुख्यमंत्री उद्धव ठाकरेंना विधान परिषदेवर जाण्याची आणखी एक संधी मिळाली आहे. २१ मे रोजी या निवडणुका पार पडणार असल्याचे निवडणूक आयोगाने स्पष्ट केले आहे.

नवी दिल्ली - भारतीय निवडणूक आयोगाने महाराष्ट्रात विधान परिषद निवडणुका घेण्यास परवानगी दिली आहे. राज्य विधान परिषदेच्या नऊ जागांसाठी २१ मे रोजी ही निवडणूक पार पडणार आहे. कोरोनाच्या पार्श्वभूमीवर, या निवडणुका घेताना विशेष खबरदारी घेण्याचे निर्देश निवडणूक आयोगाने दिले आहेत. निवडणूक आयोगाच्या या निर्णयामुळे मुख्यमंत्री उद्धव ठाकरेंना विधान परिषदेवर जाण्याचा मार्ग मोकळा झाला आहे.

महाराष्ट्र विधान परिषदेच्या 9 जागांसाठी निवडणूक जाहीर करण्यासंदर्भात राज्यपालांनी काल निवडणूक आयोगाला पत्र लिहिले होते. मुख्यमंत्री उद्धव ठाकरे यांची राज्यपाल नियुक्त सदस्यपदी नियुक्ती करावी, अशी शिफारस महाविकास आघाडीतील तिन्ही पक्षांनी मंगळवारी राज्यपाल कोश्यारी यांना केली होती. त्यानंतर काल कोश्यारी यांनी निवडणूक जाहिर करण्याची विनंती केली होती. त्यावर निर्णय घेण्यासाठी निवडणूक आयोगाने आज सकाळी बैठकीचे आयोजन केले होते. या बैठकीमध्ये निवडणुकांना सशर्त परवानगी देण्याचा निर्णय घेण्यात आला.

मुख्यमंत्री उद्धव ठाकरे हे राज्य विधिमंडळाच्या एकाही सभागृहाचे सदस्य नाहीत. मुख्यमंत्रीपद कायम ठेवण्यासाठी २७ मे पर्यंत त्यांना दोन्ही पैकी एका सभागृहाचे सदस्यत्व मिळणे आवश्यक आहे. यासोबतच, विधान परिषदेच्या 9 सदस्यांचा कालावधी 24 एप्रिल रोजी संपला आहे. त्यामुळे एप्रिल महिन्यातच या रिक्त जागांसाठी निवडणूक होणे आवश्यक होते. मात्र, कोरोनाचा प्रादूर्भाव सुरु असल्यामुळे ही निवडणूक केंद्रीय निवडणूक आयोगाने पुढे ढकलली होती.

हेही वाचा :'फडणवीस यांच्याबाबत सोशल मीडियावर आक्षेपार्ह पोस्ट टाकणाऱ्यांना अटक करा'