खासदार भावना गवळींचा निकटवर्तीय सईद खानची मालमत्ता जप्त, ईडीची कारवाई

खासदार भावना गवळी (Shiv Sena MP Bhavana Gawali) यांचे निकटवर्तीय असलेले सईद खान (Saeed Khan) यांची ३.७५ कोटींची मालमत्ता ईडीने गुरूवारी जप्‍त केली आहे. याआधीच सईद खान यांनाही ईडीकडून अटक करण्यात आली आहे.

मुंबई -खासदार भावना गवळी (Shiv Sena MP Bhavana Gawali) यांचे निकटवर्तीय असलेले सईद खान (Saeed Khan) यांची ३.७५ कोटींची मालमत्ता ईडीने गुरूवारी जप्‍त केली आहे. खान हे गवळी यांच्या महिला उत्कर्ष प्रतिष्ठान (Mahila Utkarsha Pratishthan) व अन्य संस्थांच्या आर्थिक कारभारावर लक्ष ठेवत होते असा आरोप आहे. काही दिवसांपूर्वीच ईडीने त्यांना अटक केली आहे.

शिवसेना खासदार भावना गवळी यांची सध्या ईडीकडून बेहिशोबी मालमत्ता प्रकरणी चौकशी सुरू आहे. २७ सप्टेंबरला ईडीने भावना गवळी यांना ईडीने समन्स बजावला होता. गवळी यांचे निकटवर्तीय सईद खान यांनाही ईडीकडून अटक करण्यात आली होती. आता पुन्हा एकदा या प्रकरणात ईडीकडून कारवाई करण्यात आली आहे. ईडीने सईद खान यांची ३.७५ कोटींची मालमत्ता जप्त केली आहे.

• भावना गवळींवर आरोप काय?

भावना गवळी (Bhavana Gawali) यांच्या ट्रस्टमध्ये 17 कोटींच्या कथित गैरव्यवहार प्रकरणी ईडीकडून (Enforcement Directorate) तपास करण्यात येत आहे. सामाजिक कार्यकर्ते हरिष सारडा यांनी भावना गवळी यांच्याविरोधात तक्रार दाखल केली होती. नॅशनल को ऑपरेटिव्ह डेव्हलपमेंट कोऑपरेशनकडून बालाजी सहकारी पार्टिकल बोर्डनं 43.35 कोटी रुपयांचं कर्ज घेतलं होतं. हरिष सारडा यांनी भावना गवळी यांनी एनसीडीसीकडून कर्ज घेतलं होतं. मात्र ती कंपनी कधीच सुरु केली नव्हती असा दावा केला.

भावना अ‌ॅग्रो प्रोडक्ट अँड सर्व्हिसेस कंपनीमध्ये अनियमितता केल्याचा देखील आरोप करण्यात आला होता. या कंपनीसाठी दोन वेगवेगळ्या बँकांकडून 7.5 कोटींचं कर्ज घेण्यात आलं होतं. नंतर ही कंपनी भावना गवळी यांच्या खासगी सचिवाला 7.9 कोटी रुपयांना विकल्याचा आरोप करण्यात आला होता.