मुंबई - राज्यात उद्धव ठाकरे यांना मुख्यमंत्री मानायला कोणी तयार नाही" असं वक्तव्य विधानसभेचे विरोधी पक्षनेते देवेंद्र फडणवीस यांनी आज झालेल्या भारतीय जनता पक्षाच्या कार्यकारिणी बैठकीतील भाषणादरम्यान केलं. त्यांच्या या वक्तव्याचा अल्पसंख्यांक मंत्री नवाब मलिक यांनी समाचार घेत देवेंद्र फडणवीस यांना अद्यापही आपणच मुख्यमंत्री असल्याचा भास होतोय. आताही उद्धव ठाकरे यांना देवेंद्र फडणवीस मुख्यमंत्री मानायला तयार नाहीत, असं खरमरीत ट्विट नवाब मलिक यांनी केलं आहे.
राज्यात आज राजकारणाचे गुन्हेगारीकरण झालं आहे. राज्यात दहशतवाद्यांशी व्यावसायिक संबंध ठेवले जात आहे. आज जिल्ह्या-जिल्ह्यात मंत्री, आमदार, खासदारांचे अवैध रेती, अवैध दारूचे नेक्सस सुरु आहे. महाराष्ट्रात यापूर्वी अशी अवस्था कधीही पाहिली नव्हती. या सरकारमध्ये कायद्याचे राज्य नाही तर ‘काय दे’चे राज्य आहे. राज्यात सत्ताधाऱ्यांची नुसती वाटमारी चालली आहे आणि शेतकऱ्यांकडे मात्र कुणीही पाहायला तयार नाही. एका मुलीवर 400 लोक बलात्कार करतात, काय चालले आहे महाराष्ट्रात? सरकार म्हणते आम्ही शक्ती कायदा करु. पण सरकारमध्ये केवळ ‘भक्ती’ उपक्रम चालू आहे, अशी घणाघाती टीका फडणवीसांनी केली आहे.