Avinash Bhosale : उद्योगपती अविनाश भोसले अटक प्रकरणात न्यायालय उद्या देणार निर्णय

उद्योगपती अविनाश भोसले यांना 26 मे रोजी रात्री सीबीआयने अटक केली होती. त्यानंतर त्यांना 27 मे रोजी न्यायालयात हजर करण्यात आले होते. शुक्रवारी वेळेअभावी दोन्ही पक्षकारांचे युक्तिवाद पूर्ण होऊ शकला नाही, त्यामुळे 30 मे रोजी पुन्हा अविनाश भोसले यांना हजर करण्याचे निर्देश देण्यात आले होते.

मुंबई - डीएचएफएल आणि येस बँक प्रकरणात उद्योगपती अविनाश भोसले यांना 26 मे रोजी रात्री सीबीआयने अटक केली होती. त्यानंतर त्यांना 27 मे रोजी न्यायालयात हजर करण्यात आले होते. शुक्रवारी वेळेअभावी दोन्ही पक्षकारांचे युक्तिवाद पूर्ण होऊ शकला नाही, त्यामुळे 30 मे रोजी पुन्हा अविनाश भोसले यांना हजर करण्याचे निर्देश देण्यात आले होते. आज देखील दोन्ही पक्षकारांकडून युक्तिवाद पूर्ण करण्यात आला असला तरी आज वेळेअभावी न्यायालयाने अविनाश भोसले यांच्या CBI कोठडीवर निर्णय राखीव ठेवला आहे. उद्या यावर न्यायालय निर्णय देणार आहे.

अटक केल्यानंतर अविनाश भोसले यांना मुंबई सत्र न्यायालयात हजर करण्यात आलं. यावेळी सीबीआयकडून अविनाश भोसले यांची 10 दिवसांची कोठडी मागण्यात आली होती. पण मुंबई सत्र न्यायालयाने अविनाश भोसले यांना नजरकैदेत ठेवण्याचे निर्देश दिले होते. अविनाश भोसले यांच्यावर करण्यात आलेली कारवाई बेकायदेशीर असल्याचा दावा करत भोसलेंच्या वकीलांनी रिमांडला विरोध केला. भोसले यांना वरळी इथल्या घरी किंवा सेंट रेजिस पंचताराकिंत हॉटेलमध्ये नजरकैदेत ठेवण्यात यावे अशी मागणी त्यांच्या वकिलांनी केली होती.

नेमकं प्रकरण काय - पुण्याचे बांधकाम व्यावसायिक अविनाश भोसले यांना गुरुवारी रात्री CBI कडून अटक करण्यात आली. DHFL प्रकरणात त्यांच्याविरोधात गुन्हा नोंदवण्यात आला होता. यातूनच त्यांच्याविरोधात ही कारवाई करण्यात आली. गेल्या वर्षी जून 2021 मध्ये अविनाश भोसले आणि त्यांच्या कुटुंबीयातील सदस्यांच्या नावावर असलेली तब्बल 40 कोटी 34 लाख रुपयांची संपत्ती ईडीकडून जप्त करण्यात आली होती. विदेशी मुद्रा प्रबंधन अधिनियमांतर्गत ही कारवाई करण्यात आली होती.

DHFL घोटाळा प्रकरणानंतर त्यांना सीबीआयकडून अटक करण्यात आली आहे. अविनाश भोसले आज कोट्यवधी रुपयांच्या DHFL ग्रुपचे मालक आहेत. रिअल इस्टेट किंग अशी त्यांची पुण्यामध्ये ओळख आहे. अविनाथ भोसले यांच्या ओळखीतील लोक सांगतात की 80 च्या दशकात ते रिक्षा चालवत असत. बांधकाम व्यवसायात आल्यानंतर सुरुवातीला कंत्राटदार ते आता पुण्यातील रिअल इस्टेट किंग अशी त्यांची ओळख आहे.