पायल तडवी आत्महत्या प्रकरण; तिन्ही संशयित आरोपींना १० जूनपर्यंत न्यायालयीन कोठडी

आरोपी शिकवल्यासारखे बोलतात. तपासात जराही मदत करत नसल्याचा गुन्हे शाखेने दावा केला. समोरासमोर चौकशीसाठी पोलीस कोठडी आवश्यक असल्याची मागणी गुन्हे शाखेने केली. मात्र न्यायालयाने या तिनही आरोपींना न्यायालयीन कोठडी ठोठावली.

मुंबई- पायल तडवी आत्महत्याप्रकरणी आज न्यायालयाने तिन्ही संशयित आरोपींना १० जूनपर्यंत न्यायालयीन कोठडी ठोठावली आहे. गुन्हे शाखेने समोरासमोर चौकशीसाठी पोलीस कोठडी आवश्यक असल्याची न्यायालयाकडे मागणी केली. मात्र न्यायालयाने या तिन्ही संशयित आरोपींना न्यायालयीन कोठडी ठोठावली.

आज झालेल्या युक्तीवादात गुन्हे शाखेने घटना घडल्यापासून अद्याप सुसाईड नोट मिळाली नाही. या तिन्ही संशयित आरोपी शिकवल्यासारखे बोलतात. तपासात जराही मदत करत नसल्याचा गुन्हे शाखेने दावा केला. समोरासमोर चौकशीसाठी पोलीस कोठडी आवश्यक आहे. घटना घडली त्यादिवशी पायल आरोपींच्या सोबत होती. मात्र दुपारनंतर ही घटना घडली. यादरम्यान नक्की काय झाले हे शोधणे आवश्यक असल्याचेही गुन्हे शाखेने न्यायालयात सांगितले.
पायल तडवी प्रकरणातील साक्षीदार स्नेहल शिंदेने आरोपींच्या विरोधात साक्ष दिली. स्नेहल शिंदे ही पायलची सहकारी होती. तिच्यासमोर पायलला जातीवाचक टोमणे मारण्यात आल्याचा दावा वकील राजा ठाकरे यांनी युक्तिवाद करताना केला. डॉ. हेमा अहुजा पायल ताडवीला तू मागासवर्गीय कोट्यातून आली आहेस, असे म्हणाल्या होत्या. पण मी रँकवर आली असून टॉप केले आहे, असे पायलने सांगितल्याची साक्ष स्नेहल शिंदेने पोलिसांकडे दिली आहे. पायलच्या कुटुंबियांकडून वकील राजा ठाकरे यांनी युक्तिवाद केला.

आरोपींचे वकील आबात पोंडा यांनी 23 तारखेला गुन्हा दाखल झाला. पण पोलिसांना अजूनही ठोस काही मिळाले नाही. सुसाईड नोट असती, तर मिळाली असती. पोलिसांनी सुसाईड नोट शोधून काढावी. कागदपत्रांच्या आधारे पोलीस कोठडी मागण्यात अर्थ नसल्याचा युक्तीवाद त्यांनी केला.

भक्ती मेहेरची आई म्हणते मुलगी निर्दोष . . .. .

डॉक्टर पायल तडवी आत्महत्या प्रकरणी तिन्ही संशयित डॉक्टर महिलांना न्यायालयीन कोठडी ठोठावण्यात आली आहे. याप्रकरणी आज भक्ती मेहेरच्या आईने आज माध्यमांसमोर येऊन प्रतिक्रिया दिली आहे. माझी मुलगी जातीवरुन रॅगींग घेऊनच शकत नाही. त्यामुळे पायलच्या कुटूंबीयांनी केलेले आरोप निराधार असल्याचे भक्ती मेहरच्या आईने म्हटले आहे.