मुंबई -राज्यसभा ( Rajya Sabha Election 2022 ) निवडणुकीसाठी महाविकास आघाडीने कंबर कसली असून, प्रत्येक अपक्ष आणि लहान पक्षाच्या आमदारांसोबत संपर्क साधण्याचा प्रयत्न केला जात आहे. त्या आमदारांनी महाविकास आघाडीच्या उमेदवाराला मतदान करावे, अशी विनंती केली जाणार असल्याची माहिती काँग्रेसचे प्रदेशाध्यक्ष नाना पटोले यांनी दिली आहे. काही नाराज अपक्ष आमदार आहेत. त्यांनी मतदानापूर्वी आपली नाराजी व्यक्त केली आहे. मात्र त्यांनी नाराजी व्यक्त करणे यात काहीही गैर नाही. आपल्या मतदारसंघातील कामांसाठी याबाबतची नाराज आमदारांनी व्यक्त केली असून, अपक्ष तसेच लहान पक्षाच्या आमदारांची नाराजी ( Independent MLA ) दूर करण्याबाबत आज ( मंगळवारी ) महाविकास आघाडीच्या नेत्यांच्या होणाऱ्या बैठकीत चर्चा होणार आहे. तसेच ती नाराजी लवकरात लवकर दूर व्हावी यासाठी मुख्यमंत्र्यांना काँग्रेस विनंती करेल, अशी माहिती नाना पटोले ( Congress state president Nana Patole ) यांनी दिली आहे.
'समाजवादी पक्षाशी काँग्रेस संपर्क साधणार' :महाविकास आघाडी सरकारमध्ये असणारे लहान पक्ष मोठ्या पक्षाशी संलग्न आहेत. समाजवादी पक्ष हा काँग्रेसच्या जवळचा पक्ष आहे. त्यामुळे समाजवादी पक्षाच्या आमदारांनी महाविकास आघाडीच्या उमेदवाराला मतदान करावे, यासाठी काँग्रेसकडून समाजवादी पक्षाचे संपर्क साधला जाणार आहे. तसेच एमआयएम पक्षसोबत राष्ट्रवादी काँग्रेस पक्षाचे संबंध असून त्याबाबत राष्ट्रवादी काँग्रेस संपर्क साधेल, असेही यावेळी नाना पटोले यांनी सांगितला आहे. सगळ्यांनाच प्रत्येक अपेक्षा आणि छोट्या पक्षाच्या आमदारांना संपर्क केला जात आहे. संपर्क साधून त्यांना महाविकास आघाडीच्या उमेदवाराला मतदान करण्याची विनंती केली जाणार आहे.